ICH Weychart der Hu^erneyn vnd ich vrsula sein hausfraw^e Vnd ich Chunrat der Lehenperger, vnd mit vns All vnser Erben Wi^er veriehenn vnd tün chund offenleich mit dem prieff alln/e den, di^e in Lesent oder hornt Lesen, dy^e nu^e lebent vnd hernach chunftig sind, Daz wi^er mit gu^etem willen vnd gunst vnsrer pesten freunt vnd mit gesamter hant zu^e der zeit, do wi^er ez wol tu^en machten, Recht vnd Redleich gesaczt haben Leupolten van Greyn vnd seiner hausfrawn/e vnd allen irn/e paidn/e erben vnsern Hoff dacz den Schewrn ze Osang gelegen in sand Gorger pharr, di^e vnser vreys aygen ist, mit allen den ern/e vnd nu^eczen, alz wi^er di^e in aygens gwer selben vnuersprochenleich i^enn haben gehabt mit Allev di^e, vnd darzu^e gehort versu^echt vnd vnuersu^echt, vmb Sechczk phunt phenning wyenner Mu^enzz, di^e sev vns berait darauf gelihen habent, der wi^er auch gancz vnd gar gewert sein an Allen schaden vnd schullen auch sev den sacz inn haben an Allev J/errung vnd nu^eczen, alz sev pest mu^egen, Vnd wann sev wellent, So mu^egen sev in vmb alz vil phenning geseczen, wem sew wellent. Wy^er sein auch vnd mit vns all vnser erbn/e des saczes dez obgeschribn/e gu^ecz ir/e vnd aller ir/er erbn/e Recht gewer vnd scherm fu^er allev ansprach, als freys aygen vnd saczes Recht ist jn dem Land ze O^esterreich, waz in oder i^ern erben daran abgeht mit Recht, da sev schaden an nement, den sev mu^egen gesprechen pei i^ern/e trewn/e vngeswarn/e, den selben schaden vnd auch daz haupgu^et schullen sev haben vnuerschaidenleich auf aller der hab, di^e wi^er vnd all vnser Erben haben, wo wi^er di^e habenn, Ez sey aygen oder verlehencz gu^et, pu^erchrecht oder varnt gu^et, wi^e daz genant ist, Vnd schu^ellen sein davon bechomen vnberecht, jn welchem gericht sev dar auf choment, mit vnserm, vnd aller vnser Erben vnd frewnt gu^etleichem willen, wi^er sein Lebentig oder To^ed. Darzu^e schol auch sein vmb daz vorgenant gelt des saczes Lo^esung jaeleich (sic) an sand Kylians Tag vnd zu^e Chainer zeit mer jn dem jar. Daz di^e Red staet vnd vnczebrochen beleib, Dez geben wi^er in ze einem warn/e v^erchund den offen prieff versigelten mit vnser vorgenant weycharcz dez Hu^erneyn vnd Chu^enracz dez Leenperger Anhangunden jnsigeln. Dez sind auch geczewgen di^e Erbern Albrecht der O^eder ze den zeiten Lantrichter jn dem Machland vnd Syghart pu^erger ze Greyn mit im Anhangunden jnsigeln, di^e wir vleyzichleich dar vmb peten haben, daz sew der sach czewg sind jn paiden an schaeden. Der prief ist geben nach Christi gepu^erd Drewzehen hundert jar Vnd darnach in dem Su^eben vnd Sybenczkisten jar An sand Kylians Tag mit seiner gesellschafft.

Source Fulltext: OÖUB 9 (Wien 1906), S. 283-285