Ich Weychart der Hu^erneyn vnd ich Vrsula sein Hausfraw^e vnd ich Chunrat der Lehenperger vnd sein Hausfraw^e vnd mit vns all vnser Erben veriehen vnd tün chund offenleich mit dem prief allen den di in Lesent oder hornt lesen, die nu^e lebent vnd hernach chunftig sind, daz wi^er mit gu^etem willen vnd gunst vnserr pesten frewnt vnd mit gesamter Hant zu^e der zeit do wy^er ez wol tu^en mochten. Recht vnd Redleich verchauft vnd ze chauffen haben geben Lewpolten von Greyn vnd seiner Hausfraw^en vnd allen i^ern paiden Erben vnser freyz aygen vnd vnuerchumbert gu^et ayn Ho^eff der haizzet dacz den Schewrn ze Osang gelegen in sand Gorger Pharr di^e haben wi^er in ze chauffen geben mit allew di vnd dar zu^e geho^ert ze Holcz ze veld ze wayd vnd ze wyzmad versu^echt vnd vnuersucht mit allen den ern Rechten vnd nu^eczen, als wir di^eselben in aygens gewer vnuersprochenleich i^enn haben gehabt vmb eyn genantz gu^et, dez wi^er gancz vnd gar gewert sein an allen schaden vnd schullen auch sew allen i^ern frum da mit schaffen verseczen verchauffen vnd geben wem sev wellent an allev i^errung, vnd schullen auch wyr vnd all vnser Erben gen dem selben gu^et hinfu^er Chayn ansprach nimmer mer gehaben weder mit Recht nach an recht, Wi^er sein auch vnd mit vns all vnser erben i^er vnd aller i^err erben des obgeschriben gu^etz Recht gwer vnd scherm fu^er all ansprach alz freyz aygen Recht ist in dem Land ze O^esterreich, waz in oder i^ern erben daran ab get da sev schaden an nement mit Recht den sew mu^egen gesprechen pei i^ern trew^en vngeswarn, den selben schadn/e schullen sev haben auf vns vnuerschaydenleich vnd auf aller der Hab di^e wi^er haben vnd all vnser erben haben, wo wi^er die haben, Ez sey Aygen oder verlehentz gu^et Pu^erchrecht oder varnt gu^et, wy daz genant ist vnd schullen sein da von bechomen mit vnserm vnd aller vnser Erben vnd freunt gu^etleichem willen, wi^er sein lebentig oder To^ed. Daz di Red stet vnd vnczebrochen beleib, dez geben wi^er i^en zu^e aynem ewigen v^erchund den offen prief versigelten mit vnser vorgenantt Weychartz des Hu^erneyn vnd Chu^enracz dez Lehenperger anhangunden Jnsigeln, dez sind auch geczewgen di Erbern Albrecht der O^eder ze den zeiten Lantrichter Jn dem Machland vnd Syghart pu^erger ze Greynn mit i^ern anhangunden Jnsigeln di^e wy^er paid vleyzichleich dar vmb gepeten haben, daz sev der sach zewg sind (mit) i^ern anhangunden Jnsigeln in an schaeden. Der prief ist geben nach Christi gepu^erd Dreyzehen Hundert Jar vnd dar nach Jn dem Syben vnd Sybenczkisten Jar an sand Kylians Tag mit seyner gesellschafft.

Source Fulltext: OÖUB 9 (Wien 1906), S. 285-286