Wir Leupolt von Gotes genaden Herczog ze O^estereich, ze Steyr, ze Kernden vnd ze Krain, Graf ze Tyrol etc. Tu^on kunt, Als wir die herschaft ze O^ert gekouft haben vnd alle verlehente Guter, die darczu^o gehorent, wo (sic) ¹⁾ von vns ze lehen sind, kom fur vns vnser lieber getrewr Alber der Stüchs von Trawtmanstorf vnd gab vns auf vierdhalbs vnd dreizzig phunt geltes vnd drey dreyling weins ierkleichs perkrechtes gelegen in dem dorff ze Enczestorf auf der Vischa, die er vormaln von dem von Schowmberch, die weil der die selben herschaft ze O^ert innhet, ze lehen gehebt hat, Vnd bat, daz wir die vnserm getrewn Hansen von Tyrna Hu^obmaister in O^estereich geruchten ze leihen, wan der die von jm gekouft hiet. Das haben wir getan vnd haben demselben von Tyrna die egenanten Lehen mit aller zu^ogehorung verlihen vnd leihen auch wizzentleich mit dem brief, was wir jm ze recht daran leihen sullen vnd mugen, Also, daz er vnd sein erben die fu^erbazzer von vns vnd vnsern erben in lehens weis innhaben vnd niezzen sullen, als Lehens vnd Landes recht ist. Mit vrkund dicz briefs. Geben ze Wienn an phincz tag nach vnser frawn tag ze Liechtmesse nach krists geburde dreuczehen hundert jar, darnach in dem acht vnd Sibenczigistem jare. dominus dux per se.

Source Fulltext: OÖUB 9 (Wien 1906), S. 384-385