Ich Hanns der Mewrl, vnd all mein Erben, Wir vergehen —, Daz wir schuldig sein vnd gelten süllen, Dem erbern, Hainreichen dem Entzestorffer vnd seinen Erben, fu^emfhundert phunt wienner phenning die Si vns berait geliehen habent vnd haben Jn dafür — gesaczt — nach des Lanndes recht ze O^esterreich — die hernach geschriben Güter, die vnser Lehen sint von den erbern Herren Hern Jörgen von Waltse, vnd Hern Seytzen von Chu^enrring, von erst ein drittail des ganczen Markchtzehents ze Wuldestorf, weynczehent, vnd getraidzehent, grozzen vnd chlainen zehent — vnd Sechs schilling wienner phenning geltes, gelegen daselbens auf einem viertail eines Veldlehens, vnd vnsern Hof gelegen daselbens ze Wuldestorf, vnd alles das, daz dar zu^e gehöret — vnd ganczen zehent auf Newn halben Lehen, gelegen ze Hawgstorf, weynczehent vnd getraydczehent, grozzen vnd chlainen, ze veld vnd ze Dorff, — vnd ain drittail weynczehents gelegen ze Ruprechstorf vnd ze Stynkchenprunn, auf allen den nu^eczen vnd rechten die dar zu^e gehörent — vnd fu^emfthalb phunt, vnd zwaintzig phenning wienner mu^enzz geltes, gelegen ze Grunt auf behaustem gu^et, vnd vnsern Hof gelegen daselbens vnd vnsern weyngarten auch gelegen daselbens ze Grunt, vnd alles das, daz zu demselben Hof geho^eret, — Die vorgeschriben gu^eter allew haben wir dem egenanten Hainreichen dem Entzestorffer — gesaczt — als wir die in Lehens gewer herpracht haben, Also beschaidenleich, alle dieweil wir Si derselben fu^emfhundert, phunt nicht richten vnd wem, So su^ellen Si die vorgeschriben Gu^eter allew mit allen den nu^eczen vnd rechten die dar czu^e gehören, in nucz vnd in gewer haben, niezzen vnd nu^eczen als Saczes vnd Lanndes ze O^esterreich recht ist, an abslag der nu^ecz, Vnd su^ellen auch noch mu^egen, ich egenanter Hanns Mewrl, noch mein Erben, die vorgenanten gu^eter, von dem Hewtigen tag, als der brief geben ist, in den nechsten Chu^onftigen dryn Jaren, von Jn nicht lo^esen, Aber nach denselben dryn Jaren, So haben wir den fu^orbaz vollen gewalt vnd recht, die vorgenanten Gu^eter von Jn ze lösen, welches Jares wir mu^egen oder wellen, in den nechsten vierczehen tagen vor vnser Vrown tag zu der Liechtmesse, oder in den nechsten vierczehen tagen hinnach, vnd zu chainer andern zeit Jm iar vmb fu^emf hundert phunt wienner phenning, So habent auch der vorgenant Hainreich der Enczestorffer vnd sein Erben, vollen gewalt, vnd recht, daz Si die vorgenanten Gu^eter allew miteinander, oder daraus pey Tayln verseczen mu^ogen, wem Si wellen, vmb als uil phenning vnd in den rechten, als wir Jn die gesaczt haben, — Vnd sein auch wir, ich egenanter Hanns Mewrl vnd all mein Erben, vnuerschaidenleich, der vorgenanten Güter aller, mit allen den nu^eczen vnd rechten, die darzu^e geho^erent, des egenanten Hainreichs des Enczestorffer vnd seiner Erben Recht gewern vnd scherm fu^er alle ansprach, als Lehens vnd Satzes recht ist, vnd des Lanndes recht ze Österreich, — vnd su^ellen Si daz haben auf vns vnd auf allem vnserm Gu^ot, daz wir haben in dem Lannde ze Österreich ob der Ens vnd vnder der Ens, oder wo wir es haben, wir sein Lebentig oder tod, Vnd darüber, So gib ich obgenanter Hanns Mewrl fu^er mich vnd fu^er all mein Erben dem offtgenanten Hainreichen dem Enczestorffer vnd seinen Erben den brief cze einem warn vrchund der sach versigilten mit meinem Jnsigil, vnd mit meins Prüder Jnsigil Ülreichs des Mewrleins, der der sach geczewg ist mit seinem Jnsigel, vnd han vleizzichleich, gepeten, mein gu^et frewnt, Hern Nyclasen den Pillung von sand Giligenperg, zu den zeiten des Hochgeporn fu^ersten Herczog Albrechts ze O^esterreich Hofmarschalich vnd Hern Zachreisen den Hadrer, daz Si der sach geczeugen sint mit irn Jnsigiln Jn baiden an schaden. Der brief ist geben ze Wienn nach Christes gepu^ert Drewczehen Hundert Jar, darnach in dem Acht vnd Sybenczgistem Jar, an dem Achtten Tag nach vnser Vrown tag ze der Liechtmesse.

Source Fulltext: OÖUB 9 (Wien 1906), S. 388-390