Ich Walther der feur, vnd mein Havsfraw, vnd all vnser Erben, wie dev genant sind, Wi^er vergehen offenbar an dem prief vnd Tün chünt allen den Laüten, dev den brief an sehent ho^ernt oder lesent, Daz wir mit wolbedachtem müt mit gunst vnd willen aller vnser Erben mit Rat vnd weysüng Erberr Lau^et zv^o der zeit do wi^er ez mit recht wol getün mochten Recht vnd redleich ze chavffen haben geben zu^e einem Rechten chaüff dem Erbern man Helmlein dem Anhanger vnd allen seinen Erben dew er hat oder noch gewint, vnser Hu^eb genant dev fevrhu^ob in Haller pharr gelegen in der Hofmarich vnd vnser Recht lehen gewesen ist von den Edeln Hochgeporn fu^ersten von O^estreich, also habe wi^er im sey geben, mit allen den Ern rechten vnd nu^eczen, dev dar zv^e geho^erent vnd auch da von wechömen mu^egen ze Holcz, ze Veld, ze Waid, ze Wismad. wie daz alles genant ist, versu^ocht oder vnuersu^ocht, aus vnser nu^ecz vnd gwer in i^er nu^ecz vnd gwer mit Herren Hant vnd mit aller sta^et, vmb ein gelt, des wi^er von in gancz vnd gor verricht vnd gewert sein, an allen schaden, Also weschaydenleich, daz ich noch all mein Erben. es sein mein Swester oder ander mein Erben, wie deu genant sein, gegen der obgenanten Hüb nymer mer dhain ansprach schu^ollen haben noch gewinnen weder mit recht noch an Recht vnd verzeihen vns auch aller der Rechten dev wir an der obgenanten Hu^ebbe (!) haben gänczlich. vnd gor mit dem offen brief, Wer aver daz ander brief oder vrchund her für cha^em . . dev. di^ev obgenanten Hub Rürten es wer mit sa^eczen oder mit chau^effen oder mit Erbschaft, wan daz wer, si wa^ern Elter oder jünger dan der gegenbu^ertig brief, dev selben brief schüllen gancz vnd gor ab vnd tod sein, vnd dem obgenanten Helmlein dem Anhanger noch sein Erben nyndert schaden an der obgenanten Hu^eb seinem chau^eff in dhain sachen. Wi^er schu^ellen vnd wellen auch der obgenanten Hv^ob ich vnd mein Erben sein vnd seinr Erben Recht gewer vnd fürstant sein für all ansprach ze Hof, ze Taiding wo in des not vnd dürft geschicht vnd also chauffes Recht ist in dem Land ob der Ens. vnd gieng inn daran icht ab. was er des schaden na^em mit recht wie der schad genant wu^erd, daz er oder seinr Erben ainr gesprechen möcht, pey sein trewn an ayd vnd vngeswo^ern vnd an alles recht, Denselben schaden zv^o sampt dem Hau^epgu^et schu^ell wi^er in ablegen vnd wider chern gancz vnd gör vnd schullen si daz haben dacz vns vnd vnsern trewn, vnd darzu^e auf aller vnser Hab wo wi^er dev haben oder noch gewinnen, es sey mit dinsten oder mit Heyrat, wie ich dev hab, gebu^enn, oder wo sy gelegen sey Jnrr lants oder au^ezzer lants, versu^echt oder vnuersu^echt, in welhem gericht oder piet daz sey, dev selbig Herschaft schol im sey oder sein Erben in antwu^erten an alles Recht vnd ze red seczen vnd an alles fu^erbot mit mein vnd aller meiner Erben gütleich willen vnd wort an allev irru^eng vnd wider Red wi^er sein Lebentig oder Tod. Daz dem obgenanten Helmlein dem Anhanger vnd allen sein Erben dev sach vnd wandlung von mir vnd mein Erben, also sta^et vnd vnverchert weleib, dar über gib ich in den offen brief versigelt mit meinem aygem anhangundem Jnsigel, vnd zv^e einr pessern sicherhait vnd zevgnu^ezz mit des Erbern Petreins des Hinderholczer zu^e der zeit Phleger ze Steyr anhangundem Jnsigel mit des Hant der chavff geschehen ist vnd sein Jnsigel an den brief gelegt hat vleizz(ichlich) durich meiner pet willen im vnd seinen Erben an schaden. Der brief ist geben do man zalt von Christi gepurt Drevczehen Hündert Jar dar nach in dem Ächt vnd Sybenczgisten Jar an sand Mathes tag des Heyligen zwelifpoten.

Source Fulltext: OÖUB 9 (Wien 1906), S. 391-393