Ich Peter. Pueher mein Hau^esfraw vnd alle vnser Erben vergehen vnd tun chund, allen den die den Brif sehent ho^ernt oder lesent, vmb daz Haüs daz vns der Erber beschaiden Fridrich Scheinperiger die zeit czechmaister der pharr ze chauffen hat geben, daz der Hawbendra^eczzinn sa^elig gebesen ist, die ez zu^o der pharr geschafft hat, daz leit zwischen Jansen dez Da^erren. vnd dez Puechmader Hau^es auf dem Graben da schullen wir alle Jar von raihen vnd di^enen hincz der Pharr Sechczikch phening Ewigs geltes an sand Michels Tag. vnd schullen nimermer nicht werden abglost, vnd dem Herczogen ayn Helbling in pu^echsen, vnd swann wir daz pu^erkchrecht versiczzen. so sey wir aller der wanndl veruallen hintz der pharr, die auf Pu^erkchrecht geho^ernt nach der Statt recht ze Lincz. vnd waz si dez schaden na^em den der Czechmaister der pharr die zeit pey sein trewn gesprechen mag. den schullen wir in gancz vnd gar ab legen vnd widercheren, vnd schullen si daz haben auf vns vnd auf vnsern trewn vnd dar zu auf aller vnser hab. swo wir die haben auf wazzer oder auf Land versu^echt vnd vnuersu^echt, vnd dar vber zu einem v^erchund geben in den Brif besigelten mit dez Erbern beschaiden Jansen Stainhulber die zeit Richter vnd Mauter ze Lincz vnd mit Vlreich Smvczzer ainer die zeit dez Rates ze Lincz anhangunden Jnsigeln die si habent angelegt durich vnser vleizzig pet willen zu einer czeugnuzz in an schaden. dar hinder wir vns verpinten mit vnsern trewn, allez daz sta^ett ze haben vnd zu volfüren daz oben geschriben stet wann wir selber nicht Jnsigels gehabt haben, Der Brif ist geben nach Christez gepu^erd drewczehen Hundert Jar vnd in dem Ächt vnd Sybinczkisten Jar. an sand Angnesen tag dez phincztag.

Source Fulltext: OÖUB 9 (Wien 1906), S. 378-379