Ich Dietel V/esel, Hern Lawtweins des V/esels selig Sun, vnd all mein erben, wir vergehen, — daz wir zu widerlegung der Vogtey, vnd all der recht, die wir gehabt haben, auf, vnd an dem gu^ot ze Chrieczing, — die selb vogtey vnd recht, wir von dem Hochwirdigen fu^ersten vnserm genedigen Herren, den Bischof ze Pazzaw vnd von dem selben Goczhaus ze Pazzaw, ze lehen gehabt haben, vnd die wir den erbern geistleichen Herren, dem Abt, vnd dem Conuentt dez Chlosters ze Engelzell verchauft haben, vnsers rechten freyn aygens, vnser Gu^et ze Sedraw^et, vnd swas dar czu^o geho^ert, von dem Hochwirdigen Fu^ersten vnserm genedigem Herren, Hern Albrechten, Bischof ze Pazzaw, vnd von seinem Goczhaus, doselbs, ze rechtem Lehen genomen, vnd enphangen haben, alz lehens recht ist, — Swas aber dem Bischof vnd seinem Goczhaus ze Pazzaw, daran chrieg, oder inua^ell bescha^ehen, von wem daz wa^er, daz su^ellen wir in alles aus richten, — Mit vrkunde dez briefs, besigelten mit meins vorgenanten Dietleins des V/esels vnd mit meins lieben O^eheims, Thoman des Seyfritstorffer, die zeit Pfleger ze fürstenekk anhangunden Jnsigeln, der sein Jnsigel, durch meiner fleizzigen bet willen, zu zewgnu^ezze an den brief gehangen hat, dar vnder sich all mein erben mit sampt mir vnuerschaidenleich verpindent, mit iren trewn, vnguerleich, allez daz stät ze haben, vnd ze volfüren, daz an dem brief ist geschriben, der geben ist an nachsten Eritag, nach sand Vlreichs tag, nach Christi gebu^erde, drewczehen hundert iar vnd in dem acht vnd Sibenczigisten Jare.

Source Fulltext: OÖUB 9 (Wien 1906), S. 477-478