Ich Wolfhart der Sintzendorffer vnd mein hausuraw vnd all vnser erben veriehen offenleich mit dem prief vnd tu^en chunt allen den di in sehent, ho^erent oder lesent, das wi^er mit wohlbedachtem mu^et vnd nach vnser na^egsten vnd pesten frewnt gunst vnd weysung vnd gu^eten willen di zeit do wi^er es mit recht wol getu^en machten, recht vnd redleich verchaufft vnd geben haben den erbern purgern ze Enns zu i^erem Spital da selbs vnsern Hof gelegen in Ha^edersperiger pharr vnd genant ist in der Tann vnd der mein rechtz va^eterleichs anderstorbens Erib ist von meinen vatern Niclasen dem Sintzendorffer sa^eligen, dem got genad, vnd der rechtz vreys aygen ist mit allen eren nutzen vnd rechten di darzu^e geho^erent ze holtz ze veld ze wayd ze wazzer vnd ze wy^esmad oder wie di genant sind gestifft vnd vngestifft versucht vnd vnversucht vnd als er von alter her chommen ist. Vnd der paw man der di zeit darauf sitzet, chain recht noch anders nicht darauf hat, denn vreysa^etzen recht, also haben wir in den selben Hof in geantwu^ert vnd besta^ett mit aller sta^et vnd dar zu^e geho^ert aus vnser nutz vnd gewer in di i^eren vmb ain gelt dez wi^er von in gantz vnd gar verricht vnd gewert sein an all vnser scha^eden, Vnd haben auch vns des obgenanten Hofes mit aller zu^egeho^erung fu^ortzicht tan mit dem prief das wi^er vnd all vnser erben vnd nachko^emen fu^erbas chain recht noch ansprach darzu^e nymmer mer haben noch gewingen schu^ellen weder mit recht noch an recht. Wir schu^ellen vnd wellen auch des obgenanten Hofes mit aller zu^egeho^erung i/rr recht gewern vnd fu^orstant sein an aller stat wo in des not vnd du^erft geschi^echt, als ander rechtz vreys aygen recht hat in dem Lant ob der Enns. gi^eng in aber an der gewerschaft icht ab mit recht wie getan schaden si denn des na^emen di i^er ainer von des obgenanten spytals wegen der den prief inne hiet, pei seinen trewn wol gesprechen mo^echt an ayd vngesworn vnd an alles recht di selben scha^eden schu^ellen wir in gantz vnd gar ablegen vnd wider cheren vnd schu^ellen si das alles haben auf vns vnd auf vnsern trewn vnd darzu^e auf aller vnser hab wo wir di haben versu^echt vnd vnversu^echt vnd mügen des do von bescho^emen an chlag vnd an recht mit vnserm gu^etleichen willen Vnd schu^ellen wi^er sew noch ny^emant von vnsern wegen dar an mit nichte i^erren noch wider sein. Vnd des ze ainen vesten sichtigen vrchunt geben wi^er in den prief versigelten vnd wol besta^ett mit meins obgenanten Wolfhartz des Sintzendorffer anhangunden Jnsigl Vnd ze ainer pessern sicherhait vnd waren gezeugni^ezz mit meiner lieben vettern Seybotz vnd Chu^onratz vnd Andres der Sintzendorffer allen drin anhangunden Jnsigeln mit der gunst vnd gu^etem willen di Handlung vnd der chauf geschehen ist. Der prief ist geben nach Christi gepurd vber drewtzehn Hundert jar vnd in dem acht vnd Sybentzkisten jar des na^egsten Eritags nach sand flo^erianstag

Source Fulltext: OÖUB 9 (Wien 1906), S. 438-439