Wir Haidenreich von Meichsaw obrister Schenkch in O^esterreich, Hainreich von Waltse die zeit Haubtman ob der Ens, Hainreich von Rawhenstain, Chunrat von Potendorf, Hanns von Liechtenstain von Nicolspurch diezeit des Hochgepornen fu^ersten Herczog Albrechts cze O^esterreich etc. hofmaister vnd ich ^a) Alber von Ottenstain Tu^en kunt offenleich mit dem brief, Als die erbern herren Rudolf von Waltse diezeit Haubtman in Steyr an seinselbs vnd seiner pru^eder stat an ainem tail vnd Jo^erig von Waltse ir Veter hern Eberharts seligen Svn von Waltse von Lincz an dem andern tail vnser Sunderlieb frewnt hinder vns gegangen sint vmb alle die zuspru^ech vnd sto^ezz, die Si gegeneinander gehabt habent, als die hindergangbrief sagent, die Si vns paidenthalben darumb gegeben habent also, swas wir daru^eber zwischen Jn sprechen, daz Si das auf paiden tailen genczleich stet haben vnd dapey beleiben wellen vnd su^ellen an all widerred vnd geuer. Nu haben wir ir paider fu^erlegung chundleich auf genomen vnd verho^ert durich des willen, daz wir zwischen Jn dester frewntleicher mu^egen ausgesprechen, vnd darumb haben auch wir aynhellichleich gesprochen vnd sprechen von erst, Daz Si paidenthalben miteinander gu^et frewnt sein su^ellen, als Si des aneinander schuldig vnd gepunden sint. Darnach so sprechen wir vmb alle die geltschuld, die Si Christen vnd Juden schuldig sint, wie die genant sint, mit haubtgu^et vnd mit schaden, als dieselb geltschuld hienach benant vnd beschriben ist, daz die Rudolf von Waltse, sein pru^eder vnd ir Erben halbew gelten su^ollen vnd Jo^erig von Waltse vnd sein Erben halbew. Von erst Stewzzen dem Juden ze Wienn Aindelthundert phunt auf die Phingsten schierist chu^enftig. Jtem aberso demselben Stewzzen Tawsent phunt all iar vmb (sic) Hundert phunt, der ist ain iar nv hin. Jtem aberso demselben Stewzzen Newnhundert phunt vnd zway phunt, die sint geseczt von sant Merteins tag schierist v^eber ein iar. Jtem Hitschlein dem Juden von Lincz Hundert phunt vnd achczig phunt, darauf ist tegleich gesuch gegangen seint sant Merteins tag in dem Siben vnd Sibenzgistem iar. Jtem Lawbmann dem Juden von Herczogenburch Zwayhundert phunt, darauf ist tegleich gesu^ech gegangen seind des Sunntags vor Mitteruasten in dem Acht vnd Sibenzgistem iar. Jtem Patuschen dem Juden von Perichtoltsdorf Dritthalbhundert phunt, darauf get tegleich gesu^ech seind des Sunntags vor dem Palmtag in dem Acht vnd Sibenczgistem iar. Jtem Selden dem Juden von Znaym Hundert phunt, darauf get tegleich gesu^ech seind des Eritags vor dem Palmtag in dem Acht vnd Sibenczgiftem^b). Jtem Sundlein dem Juden Hundert phunt vnd Achczehen phunt, auf sant Merteins tag in dem Siben vnd Sibenczgistem iar, seind get tegleich gesu^ech darauf. Jtem Hetschlein dem Juden von Herczogenburch Sibenhundert phunt vnd zwelif phunt, darauf get tegleich gesu^ech seind sant Jo^ergen tag in dem Acht vnd Sibenczgistem iar. Jtem aberfo demselben Hetschlein Drewhundert phunt vnd fu^emf vnd Sibenczig phunt, die stent auf die nechsten Liechtmesse in dem Newn vnd Sibenzgistem iar. Jtem Merhlein dem Juden von Zell Drewhundert phunt vnd Sechzig phunt vnd aberso demselben Merhlein Hundert phunt vnd dieselben zwen brief hat man geseczt auf den Prehentag in dem New^en vnd Sibenzgistem iar. Jtem^c) Achtczig phunt. Jtem Fridlein dem Juden von Voytsperch Hundert phunt vnd czehen phunt, die sint gestanden auf tegleichen schaden seind der Praew^ezzen vart in dem Siben vnd Sibenczgistem iar. Jtem Ju^edlein dem Juden von Rakelspurch Hundert phunt vnd czehen phunt, die sint gestanden auf schaden seint der obgenanten Praew^ezzen vart. Jtem Yschlein dem Juden von Grecz Sibenczig phunt sint auf tegleichen schaden gestanden in dem dritten iar. Jtem Sundlein dem Juden zwai vnd Achczig phunt, darumb Jm seind sant Merteins tag in dem Siben vnd Sibenczgistem iar phant stent auf tegleichen schaden. Jtem aber so demselben Sundlein New^en phunt, die stent auf tegleichen schaden seind mitteruasten. Jtem aberso demselben Sundlein stent Sechs Pecher vmb Siben phunt, da tegleicher schad auf get seind Phingsten. Jtem Hetschlein dem Juden von Herczogenburch Aindelf phunt an dem brief, der dacz dem Vlrici leit. Jtem aber so demselben Hetschlein zwelif phunt von den Sechczig phunten, die her lienhart nam. Jtem Hetschleins Svn zehen phunt, die stent seind Phingsten auf tegleich schaden. Jtem Sundlein dem Juden Vier phunt, Jtem Cholmann dem Juden Vierzehen phunt, darumb stent kern Reinprechts phand auf tegleichen schaden in dem andern iar. Jtem Hetschleim dem Juden Vier vnd zwainzig phunt, die stent seind sant Cholmans tag auf tegleichen schaden. Jtem Sundlein dem Juden stet ein Gu^ertel mit der Chron zehen phunt seind sant Peters tag in dem Siben vnd Sibenzgistem iar. Jtem Kadolten dem Wehinger Achthundert phunt. Jtem den Tu^echeln Vierhundert phunt vnd Vier vnd Achzig phunt, Jtem Waytlein dem Marschalich Vierhundert phunt, Jtem Hennslein dem Harrocher Vierhundert phunt, Jtem dem Pernekker Tausent phunt, Jtem Hannsen dem Hager Achthundert phunt, Jtem dem Poschen Drewhundert phunt, Jtem dem Premzzer fu^er sein Purchhu^et Hundert phunt vnd Newnzig phunt, Jtem Ludweigen vom Stain Vierczig phunt, Jtem der Geblinn fu^enfczig phunt, Jtem dem Zinkken Acht vnd Vierczig phunt vnd Siben vnd Dreizzig phenning. Jtem Jacoben dem Goltsmit Vierzehen phunt vnd Drey schilling, Jtem demselben Goltsmit Aindlef phunt, Jtem Vlreichen dem Satler Drew vnd Vierzig phunt, Jtem dem Wolf ze Grecz zwaihundert phunt vnd Sechzig phunt, Jtem Hermann dem purger ze Grecz Hundert phunt vnd fu^emfzehen phunt, Jtem Petrein dem Schreiber Hundert phunt vnd Vier vnd zwainzig phunt, Jtem dem Forstmaister Sechs vnd zwainzig phunt. Die vorgeschriben geltschuld allew hincz Juden vnd hincz Christen, als Si vor an dem brief benant ist, mit haubtgu^et vnd mit schaden sprechen wir, daz die Rudolf von Waltse, sein pru^eder vnd ir Erben halbew gelten su^ellen vnd der egenant Jo^erig von Waltse vnd sein Erben halbew. Denn vmb die czwai Tawsent phunt vnd Siben hundert phunt, die derselb Jo^erig von Waltse seinen frewnten geben mu^es fu^er iren erbtail, sprechen wir, Daz Jm Rudolf von Waltse vnd sein pru^eder darinn zehilf su^ellen geben Sechshundert phunt vnd fu^emf vnd Sibenczig phunt. Denn die v^ebrigen czway Tausent phunt vnd fu^emf vnd czwainzig phunt su^ellen derselb Jo^erig von Waltse vnd sein Erben gelten. Wir sprechen auch, Daz Rudolf von Waltse vnd sein pru^eder geben su^ellen dem vorgenanten Jo^ergen von Waltse an geuer alle die brief, die Si seind seins Vaters tod hern Eberharts von Waltse seligen gelo^est habent von Christen vnd von Juden, vnd daz Si Jm auch geben vnd inantwurten su^ellen alle die brief vnd alle die varundhab, wie die genant ist, die der egenant sein Vater hinder Jm lazzen hat, die Sie nach seinem tod funden vnd ingenomen habent an geuerd, auch su^ellen Rudolf von Waltse vnd sein pru^eder alle die brief vnd varundenhab, die Si von der Pettawerin ingenomen habent, Dem vorgenanten Jo^ergen von Waltse inantwurten vnd geben an geuer. Wir sprechen auch, daz derselb Jo^erig von Waltse vnd sein Erben Rudolfen von Waltse, sein pru^eder vnd ir Erben vmb allen den tail, den er an der vorgenanten geltschuld gelten sol, als vorgeschriben stet, vmb haubtgu^et vnd vmb schaden ledigen vnd lo^esen sol zwischen hinn vnd dem nechsten chu^enftigen Vaschang. So su^ellen auch Si Jn in derselben zeit vmb die vorgenanten Sechshundert phunt vnd fu^emf vnd Sibenzig phunt, die Si Jm in den zwain Tawsent vnd Sibenhundert phunten zehilf geben su^ellen, ledigen vnd lo^esen, vnd welher tail vnder Jn des sawmig wer vnd den Andern in der zeit vmb die geltschuld, die er aufrichten sol, nicht ledigt, swas denn fu^erbas schadens darauf get dacz Juden vnd dacz Christen, der sol aller gen auf den tail, der des sawmig ist. Auch sprechen wir, ob fu^erbas icht brief fu^er chemen, die vmb geltschuld sagten, es wer hincz Juden oder hincz Christen, die in dem gegenbu^ertigen brief nicht gemeldet vnd benant sint, ist daz dieselben brief sagent von dem egenanten hern Eberharten von Waltse, so sol es der vorgenant Jo^erig sein Svn vnd sein Erben gelten vnd ausrichten vnd sullen Rudolf von Waltse, sein pru^eder vnd ir Erben des allerding vnengolten beleiben. Wer aber, daz dieselben brief sagten von demselben Rudolfen oder von seinen pru^edern, so sullen auch er vnd sein pru^eder vnd ir Erben das gelten vnd aufrichten vnd sol des der egenant Jo^erig vnd sein Erben allerding vnengolten beleiben. Wir sprechen auch vmb alle die nu^ecz, wie die genant sint, die Rudolf von Waltse vnd sein pru^eder ingenomen habent von des egenanten Jo^ergen von Waltse hab vnd gu^etern allen vncz auf den hewtigen tag, daz derselb Jo^erg noch sein Erben fu^erbas hincz Jn noch hincz iren Erben vmb dieselben nu^ecz chain Ansprach noch vodrung haben noch gewinnen sol weder vmb vil noch vmb wenig. So su^ellen auch Rudolf von Waltse noch sein pru^eder von der phlegnu^ezz wegen, daz Si denselben Jo^ergen iren Vetern vnd sein hab inngehabt habent, vmb dhainerlai mu^ee, die Si damit gehabt habent, noch vmb dhainerlai czerung oder choft, die Si von irer hab dar gelegt hieten, fu^erbas hincz demselben Jo^ergen chain ansprach noch vodrung haben. Darnach sprechen wir, welher tail vnder Jn den vorgeschriben vnsern spruch yndert v^eberfu^er vnd genczleich nicht stet hielt vnd volfu^ert in allen den Artikeln vnd Stukchen, die vor benant vnd begriffen sint, das der dem Andern tail, der den spruch stet haldet vnd volfu^ert, ablegen sol alle die scheden, die der des nimpt, wie die scheden genant sint, vnd sol der tail, der den spruch stet haldet, das haben auf aller der Hab, die der ander tail hat, der den spruch nicht stet haldet, wie die genant ist, Vnd sol auch vnser herr der Herczog, oder wer seinen gewalt hat, den tail, der den spruch nicht stet haldet, darzu^e no^eten, daz er alls das stet halt vnd volfu^er, daz wir gesprochen haben, Als dauor verschriben vnd begriffen ist, vnd daz er den andern tail, der den spruch stet haldet, alle die scheden abgeleg, die der des nimpt, wie die scheden genant sind. Vnd daru^eber, daz das alles fu^erbas stet vnd vnzebrochen beleib, so geben wir Den offtgenanten Rudolfen von Waltse, seinen pru^edern vnd allen iren^d) Erben den brief versigelten mit vnsern der obgenanten Sechs spruchmann anhangunden insigln, als auch wir dem andern tail einen semleichen spruchbrief dem gegenbu^ertigen in allen artikeln vnd pu^enden geleichhelunden gegeben haben. Daz ist geschehen vnd ist der brief gegeben ze Wienn^e) nach kristes Gepu^ert Drewzehen hundert iar, darnach in dem Acht vnd Sibenzgistem iar des nechsten Vreytags vor sant Merteins tag.

Source Fulltext: OÖUB 9 (Wien 1906), S. 518-523