Wir Albrecht von Gotes gnaden Herczog ze Östereich, ze Steyr, ze Kernden, vnd ze Krain, Graf ze Tyrol zc. embieten vnserm getrewn A^elblein von Zelking, vom Weinperg vnser gnad, vnd alles gu^et. Vnser getrewn, die purger von der Freyenstat, habent vns mit chlag für bracht, daz du in ze schaden, in dem dorff ze Cherspavm Pier prewest, vnd mainest, auch da, wein ze schenchen. Nun sein wir mit gu^eter chuntschaft wol beweiset, daz du des nicht recht habest. Da emphelhen wir dir, vnd wellen gar ernstlich daz du dauon lazzest, vnd daselbs ze Cherspavm, vnd anderswo, da es dir nicht erlaubet ist, chainen wein schenchest, noch pier prewest, vnd die vorgenant vnser stat zu der Freienstat, beleiben lazzest, bei allen iren rechten, alz das von alter herchömen ist, wan, tetest du des nicht, So haben wir geschafft mit dem Tonpeken, oder wer vnser Phleger ist zu der Freien stat, daz er dir das vast were, von vnsern wegen vnd des mit nichte lazze. Geben ze Lyncz an mentag vor sand Symons vnd sand Judas tag der zwelf botten, anno zc. L.XXVIIJo.||
d(ominus) dux p(er) magistrum curie de L.(iechtenstein).

Source Fulltext: OÖUB 9 (Wien 1906), S. 517