Ich Rüger von Starichenberch der jünger vnd mein hausfraw Elspet vnd mit sampt vns all vnser Erben swie di genant sind, vergehen offenleich mit dem prief vnd tu^on chu^ent alln den, di in hörnt, sehent, oder lesent, daz wir mit wolbedachtem mu^ot zu der czeit vnd wir is mit recht wol getu^on machten Recht vnd redleich gesatzt haben zu^o einem rechten satzz Hartneyden dem Chramer pu^orger ze Wels vnd allen sein Erben, Vnsern hof auf dem Pewrezz gelegen in Ro^etenpekcher pharr, da di czeit Hainreich der mair auf gesezzen ist, der vnser rechtz aygen ist mit allen den rechten, Ern, nüczzen vnd dar czu^o geho^ert ze Holcz, ze Veld, ze wismat oder swie daz genant oder gelegen ist chlain oder gro^ez versucht vnd vnuersucht ze gleicher weyz, alz wir in inn gehabt haben vnd alz er von altter her chömmen ist aus vnser nu^otzz vnd gewer in i^er nu^otzz vnd gewer für an Czway Sechczik phunt alter wienner phenning, der wir ze rechten taegen von in gancz vnd gar verricht vnd gewert sein in der beschaiden, daz wir vollen gewalt haben von in ze lösen auf vnser vraw^on tag zu der Liechtmezz var acht tag oder hin nach acht tag Vmb di obgenannten phenning. Lözen wir dann nicht zu dem selben ob benanten vnser Vrawntag, der schi^erst chu^empt, so haben wir vollen gewalt von in ze Lösen all jar ja^erleich zu dem obgenanten tag vmb daz obgeschriben gelt vnd swenn si den obgenante Satz nicht lenger inn wellent haben noch mu^egen, so habent si auch vollen gewalt iren Satz zu versetzen vnd zu verchauffen, geben, swem si wellent vmb daz obgeschriben gelt und nicht tew^orer, Vnd dez selben irs obgenannten geltz da von bechömmen, so si nachst vnd pest mügen mit vnserm gu^etleichen willen an all irrung. Wir sein auch dez obgenannten Hofs vnd dez Saczz dar auff ir Recht gewern vnd fu^erstant an aller der stat vnd in sein nöt vnd turft geschiecht nach dez Landesrecht ob der Enns. Gieng aber in daran icht ab oder daz in inndert dhain Chrieg dar inn auf erstünd mit recht von wem daz wa^er, den schullen wir in aus richten vnd richtig machen an all ir schaeden gancz vnd gar, Vnd waz si dez dar über schaden nement, den der obgenante Hartneyd oder ain seiner Erben gesprechen mag, pey sein trewn an alz recht, den schullen wir in ablegen mit sampt dem Haupgu^et gancz vnd gar, Vnd schullen si daz allez haben dacz vns vnd vnsern trewn vnd dar czu^o auf all ander vnser Hab, di wir haben swie di genant oder (wo di) gelegen ist, versu^ocht vnd vnuersu^ocht, vnd dar über zu einer warn vrchund geben wir in den gengbu^ertigen (!) prief versigelten mit mein obgenanncz Herrn Rügers von Starichenberch aygen anhangundem Jnsigel, dar vnder ich mich obgenantew Vraw Elspet verpintt mit mein trewn alz daz stät ze habn daz oben verschrieben ist, Vnd versigelt mit der Erbern Dytreichs dez Awer di czeit mein Richter vnd Stephans dez Jnnerseär ihr payder anhangunden Jnsigel, di si an habent gelegt durich vnser vleizzigen pet willen zu einer zeugnu^ezz der obgeschriben sach in vnd i^oren Erben an schaeden. Der prief ist geben nach Christi gepurd Drewczehen Hundert jar dar nach in dem aecht vnd Sibenczkisten jar dez Eritags nach dez Heyligen Herrn sand Merteins tag.

Source Fulltext: OÖUB 9 (Wien 1906), S. 531-532