Wir Albrecht von gotes gnaden, Herczog ze O^esterreich, ze Steyr, ze Kernden, vnd ze Krain, Graf ze Tyrol zc. Embieten vnsern getrewn . . dem Richter, vnd dem Rat ze Ens, vnser gnad, vnd alles gu^ot. Vmb die Stewr, der ir vns auf den nechsten chunftigen sand Merten tag, ze geben, gepunden seit. Empfelhen wir ew, vnd wellen gar ernstlich, daz ir dieselb Stewr, vnd vnsern tail, auf denselben sand Merten tag vnuerczogenlichen gebet, vnd geuallen lazzet, zu vnsern Handen, vnserm getrewn, Hansen von Tyerna, vnserm Amptmann, oder wer si, von seinen wegen, vnd mit seinem brief, an ew vordert, vnd des mit nichte lazzet, wann wir dasselb gelt, auf den egenanten tag, an solich stet verschaffet haben, da wir ez ze rechter not haben muzzen. Geben ze Wienn an Mentag, vor sand kolmans tag. L. XXVIIJo. . d . dux .

Source Fulltext: OÖUB 9 (Wien 1906), S. 508