Wi^er Albrecht von gotes gnaden Herczog ze O^estereich, ze Steyr, ze Kernden, vnd ze Krain, Graf ze Tyrol etc. Tu^on chunt Vmb die chrieg vnd sto^ezze, die da gewesen sind, zwischen fridlein dem Wurm vnd hansen dem Hu^oter von Galnewnkirchen an aim tail vnd Margreten des Gvnderleins tochter vnd Henslein dem Teufel, irem wirt an dem andern tail, von ettlicher zehent wegen gelegen in Galnewnkircher, vnd in Wartperger pharr, die von dem Bischof von Pazzaw^o ze lehen sind, Daz darvmb, fu^er vns vnd vnser herren chom, vnser getrewr lieber Hans der Trawner, von des egenanten Wurms, vnd des Hu^oter, vnd i^err erben wegen, vnd auch die vorgenant Margret, vnd i^er wirt der Tevfel, von i^erselbs wegen, vnd zaigten vns, ze pederseitt, i^er brief, vnd i^er vrchund, die si gen einander hetten, vnd giengen auch, der obgenanten i^err sto^ezze genczlich hinder vns, vnd die vorgenanten vnser Herren, Also, swaz dieselben vnser Herren, darvmb erfunden, vnd sprechen, das wolten si genczlich sta^et haben, vnd volfu^eren. Nu habent si vor vns erfunden, vnd gesprochen zu einem rechten, Daz die vorgenanten Margret, des Gvnderleins tochter vnd i^er wirt der Teufel, bey nu^ecz vnd gewer, der obgenant zehent beleiben sullen, vnd hab dann der Trawner, oder yeman ander, dawider icht zesprechen, der sulle das tu^on, mit einem Landes rechten, vor dem Bischof ze Pazzaw, von dem die zehent ze lehen sind, oder swem er das, an seiner stat emphilhet. mit vrchund dicz briefs. Geben ze Lyncz an Mentag vor sand Symons, vnd sand Judas tag der zwelfbotten Anno domini Millesimo. CCCo. LXXo. octauo. dominus dux in Consilio.

Source Fulltext: OÖUB 9 (Wien 1906), S. 517-518