Ich Hans der Schi^ekcht vnd all mein eriben vnuerschaidenleich vergehen mit vrchunt dez priefs daz wi^er mit wolbedachten mu^ett vnd vnbedwv^engenleich ein Trewn staetten Hinderganch getan haben nach Erber Lewtt ratt Hinder den erbern beschaiden Albrecht dem Tanpekchen ze der zeit Phleger ze der Freynstat, Vmb all die missehelüm (!) vnd zu^e spruch, di wir gehabt haben hincz Symon dem Ermon vnd sein erben von der ansprach wegen vnd in vaell, di wir ¹⁾ hincz in haben gehabt, wie di genant ist, es sey aygen, Purchrecht oder verlechentew Hab aüs genomen dy^e Stuckcht von der Pochendorfinn, der selben vorgenanten Hinderganch hat der vorgenant Phleger dem: Erbern Rat Empholichen zu^e der Freynstat hincz i^ern trewn daz dy mynn vnd recht für sich schullen nemen vnd sullen vns frewntleich mit einander berichten Vnd waz der Erber rat zwizchen (vns) der vint vnd spricht da schol ez pey beleiben vnd daz selbig gelüb ich vorgenanter Hans der Schyekch vnd mein eriben mit vnsern trewn an ayd stat staet behalten. wer aber daz wir daz in dhainer weys vberfüren so waer wir dem Hochgeparn vnsern genadigen Herrn den Herczogen von O^esterreich vervallen Sechczig phunt phenning Vnd dem Egenanten phleger vnd dem Rat auch Sechczig phunt phenning, dar zu^o hiet ich all mein recht verlornn. Mit vrchunt dez priefs den ich Egenanter Hans Schiekch gib versigelt mit dez obgenanten Albrecz des Tanpekchen vnd Thomans dez Swanttner pürger ze der Freynstat auf gedrukchten Jnsigel, di si dar an gelegt habent durch vnser vleizzigen pett willen, in vnd irn eriben an schaeden, dar vntter verbintt ich mich obgenanter Schiech mit sampt mein eriben als daz staet ze haben daz oben verschriben ist. Der prief ist geben dez Phincztags in der andern Vastwochen anno ²⁾ domini Mo. CCOo.LXXIX.

Source Fulltext: OÖUB 9 (Wien 1906), S. 590-591