Wir Albrecht von gotes gnaden Herczog ze Ostereich ze Steyr, ze Kernden vnd ze Krain, Graf ze Tyrol Bechennen vnd tu^on kunt offenlich mit disem brief, Daz die erbern vnser getrewn, die Purger von Ens fur vns komen vnd chlagten vns, wie si grozze vnd manigerlay gepresten hieten von des Pier prewn wegen, da von si vnd dieselben vnser stat ze Ens in kunftigen zeiten ze merklichen vnd nemleichen scheden komen mechten. Nu haben wir angesehen vnd betracht diselben ir klag vnd gepresten, vnd haben in die gnad getan vnd tu^on auch, daz si ierlich zwischen vnser frawn tag ze der Lichtmesse vnd dem nesten sand Jorgen tag darnach Prewn, verschenken, vnd vertu^on suln vnd mugen sechczig Dreiling pier, ez sey in grozzen oder in klainen Veslein, vnd nicht mer, vnd sol der Rat daselbs ze Ens sechs darzu alle iar nemen vnd seczen, die ze Ens gesezzen vnd seshaft sein, vnd die grozzer vnd andrer arbeit nicht pflegen noch treiben kunnen noch vermugen, alz das von alter herkomen ist, mit vrkund dicz brifs. Geben ze wienn an Suntag, alz man singet Oculi in der Vasten Nach krists gepurde dreuczehen hnndert Jar darnach im Newn vnd Sybenczistem Jare. d. d. Mr. plis m. c. d. 1. Joh. de Tyrna.

Source Fulltext: OÖUB 9 (Wien 1906), S. 591