Ich Margret die Raytenpergerinn¹⁾ ze den zeiten gesezzen ze Hierspach vnd all mein Erben veriehen — vmb di Acht vnd zehen Schilling Regenspurger pfenning, die ich mir mein Lebtag gechauft han von vnserm Lieben freunt Otten dem Poppenperger von Rotolczhaim von seiner Hausfrawn vnd allen irn Eriben auf den zwain Hueben ze Poppenperg die ich mein lebtag iärleich daraus haben schol an allen abgankch vnd wann ich mit dem Tod abgen da got Lang vor sey, So schol der vorgenant Gelt vnd auch die Hueb von vns vnd vnsern Eriben ledig vnd los sein dem obgenanten Otten dem Poppenperger seiner Hausfrawn vnd allen irn Eriben, also daz wir noch niempt von vnsern wegen nach dem vorgeschriben gelt vnd Hueben hincz in dhain zuespruch noch ansprach nymer mer haben noch gewinen schullen weder mit recht noch an recht Geistleich noch werltleich in dhainer weis. Vnd was wir da wider mit in chriegen oder rechten wolten, — daz habent si an aller Stat behabt vnd wir verlorn. Mit vrchund dez briefs den wir in dar vber geben wesigelten mit dez Erbern Herren Hern Hannsen dez Sigenhaimer von Liechtenburkch vnd mit dez erbern manns Hainreichs von Mitich anhangunden Jnsigeln, —. Geben des Freytags vor sand Jörigentag Nach Christi gepu^ertt drewczehen Hundert Jar vnd dar nach in dem Nawn vnd Sibenczkisten Jar.

Source Fulltext: OÖUB 9 (Wien 1906), S. 921-922