Ich Oswald in dem Staina^ech vnd mein Hawsfraw fraw Katrey vnd all vnser erben, wie dew genant sind, wir veriehen — daz wir — verchawfft vnd hin gegeben haben vnsrew zway guet ain guet gelegen an dem Dresch v^entter Pu^echlärer vnd ain guet gelegen zu^e alten Jrni^eng, da zu^e den zeiten weypold auf gesezzen ist vnd ain Hofstat di dar zu^e geho^ert di pey der obern Swayg gelegen ist daselbs — fu^er rechcz ffreys aygen dem erbern mann Öttlein dem Albmer vnd allen seinen erben — mit allen den ern rechten nuczen vnd gesüchen di darczu^e geho^erent — mit sampt der Hofstat alz ander ir aygenleiche Hab vnd di guet sind gelegen in Jrnynger Pharr, vmb Hundert phunt gueter alter wienner phenning —, Wir schullen in awch di vorgenanten gueter schermen vnd frein vnd ir gewer vnd fürstant sein —, also aygens vnd chawffs recht ist vnd also Landes recht ist in dem Laut ze Steyr — —. Daz in dew Red also sta^et vnd vnczebrochen von vns peleyb, Dar über geben wir in den offen pri^ef pesigelten mit mein selbs vorgenantz Oswaltz in dem Staina^ech aygen anhangundem Jnsigel pesigelt vnd zü ainer pezzern vrchund, warhait vnd sicherhait der obgeschriben sach haben wir gepeten di erbern Lawt Ha^ertlein von dem Rotenmann vnd Maricharten den Tanpekchen, daz sew irew Jnsigel zu dem meinen an den prief gehangen habent durich vnser vleizzigen pet willen in vnd i^eren erben an all scha^eden, dar vnder verpind ich mich vorgenantter Oswald in dem Steina^ech vnd mein Hawsfraw fraw Katrey vnd all vnser erben allez daz Stät ze haben vnd ze volfu^eren, daz an dem pri^ef geschriben stet vnder den vorgenantten Jnsigel mit vnsern trewn an aydes Stat vnd an geuär. Der prief ist geben nach Christi gepu^ert vber Drewczehen Hundert iar vnd dar nach in dem Naw^en vnd Sibenczkistem iar an dez Heyligen Herren Sand Jo^erigen Tag.

Source Fulltext: OÖUB 9 (Wien 1906), S. 614