Ich Wernhart dez Chürsner aydem, mein Hausfrau Wandel vnd all vnser erben vergehen daz vns vnser gnediger Herr Herr Ott Abbt dacz sant Peter zu Salczpurg, Albrecht prior vnd der gancz Conuent daselbs verlihen habent zu rechtem erbrecht di halb Hueb in der mittern Vils in irm/e Ampt ze Praitnaw glegen mit allen den rechten, nüczzen, eren, gesuechen, di dar zuo geho^ernt, ze Holcz, ze veld, ze Wismad, versu^echt vnd vnuersu^echt, wie di genant sein, alls si von alter her cho^emen sind, mit der beschaiden, daz wir dem vorgenanten gotzhauz von der vorgenanten halben Hu^oeb Ja^erleichen raichen vnd dien schüllen ze vnser fravn tag alls si geporn ward, sechczig wienner phenning an allen abganng vnd nit mer, di dan gib vnd ga^eb sind vnd schullen ia^erleich ze rechter stiftzeit cho^emen in di stift mit zwain Hu^enern, wann vns dar in gepoten wi^ert. Wi^er sullen auch di vorgenante halben Huob weder verseczzen noch verchauffen noch mit chainerlay di darzuo geho^ert ze fro^emder Hant pringen an vnser obgnanten Hern willen. Auch sullen wir di vorgnanten halben Huob vestiftleich vnd paüleich in haben an gefer, Wir bechennen auch ob sich di obgnant halb Huob verwandelt mit dem. tot. oder mit verchauffen oder mit verseczzen, oder wie sich daz fu^egt, so sol der nachst erb wider von vns di halb Huob von dem obgnanten gotzhaus raichen alls erbrechtz recht ist, Wär aber daz daz wir der obgnanten pvnt chain volfüern vnd daz selb vber farn in dreyn virzehen tagen nicht wider teten, vnd wider pringen, so sei wir zu igleichen virzehen tagen geuallen vmb daz wandel. Wa^er auch daz wir nach drein virzehen tagen di vber farung vnd wandel nit wider pra^echten, so sey wir geschaiden. von allen vnsern rechten, di wir darauf gehabt haben vnd nuczzen, so sol sich vnser obgnanter Her vnd daz Goczhauz der halben Hu^eob vnder winden vnd i^ern frum da mit schaffen alls mit i^erm vnd i^ers goczhauz Hab vnd ledigem guet vnd sullen darnach weder mit recht noch an recht geistleich noch weltleichem hincz vnserm obgnanten gnedigen Hern vnd dem gotzhaus chain ansprach nit haben zu sand Peter ze Salczpurg. Daz in daz allez stet vnd vnzeprochen peleib dem obgnanten gotzhaus geb wir in den prief pesigelt mit der erbern zwaier anhangunden insigeln Niklo dez Eau^etter vnd Steffans des Hierten von Lambach, di paid ir insigel durch vnser vleizzigen pet willen daran gehangen habent in an schaden vnd allen iren erben. Mit vnsern treun allez daz stet ze laisten vns vnd vnsern erben daz an dem prief verschriben stet. Der geben ist nach Christi gepu^erd dreu czehen Hundert iar Darnach in dem navn vnd sibenczkisten iar an sand Lorenczen tag.

Source Fulltext: OÖUB 9 (Wien 1906), S. 672-674