Ich Porczel vnd ich Peterll Ped prueder dye Chapplan vnd vnser hawsfrawn vnd all vnser Eryben, die wir haben oder noch gewynnen, veriehen vnd Tün chu^ent offenbar an den Pryef, Daz wir v^ens gancz vnd gar ferricht vnd ver ay^ent haben mit Petern dem Harocher vnd mit allen seynen Eryben vmb die gueter yn der Czell vnd am Staynach, die Lechen synt von meinn Hern von Ro^esenberch, Alzzo, daz wir noch vnser eriben, Da nach Chayn ansprach noch zuspruch ny^emer mer gehaben schullen noch mugen weder myt recht noch an recht vnd verczeihen v^ens auch der hin fur mit rechter furtzicht. wa^er aber daz, daz wir daz indert vber furen oder waz wir da wyder reten oder ta^eten, daz hyten wir alles verlorn vnd sy wehäbt. wir seyn auch der obgenanten Gu^eter ir recht gewer vnd furstant tür all ansprach, wo in sein not geschi^echt allze Chaufs recht ist nach dem la^entz recht ob der Enns. w^ear aber daz, daz in mit recht an der gewerschaft icht ab gieng, wye sich daz fu^eget, waz sy des Schaden na^emen vder wye der Schad genant wer, den ir ayns Gesprechen mäg bei seinen Trevn an ayt vnd alles recht irn worten dar vmb ze gelauben, den selben Schaden, loben wir in gancz vnd gar ab ze legen vnd wider chern vnd sullen sy daz haben dacz vns vnd dacz v^ensern Train vnd da zu auf aller vnser hab, wo wir die indert haben, wesuecht vnd vnbesu^echt, vnd wo sy vnser ob genantew hab indert an chömen, der mugen sy sich als vil vnder winden vncz daz sy irer Schäden gancz vnd gar Gericht vnd gewert werdent, vnd schullen wi^er daz mit nichtew wyder reden nöch wider sprechen. Mit vrchünd dez Priefs, den wi^er in dar vber geben versygelten vnder meym obgenanten Porczli^ens dez Chapplan anhangu^endem jnsigel vnd zu einer Peßern Sicherhait vnd zevgnüz versygelt vnder vnsers Lieben vettern jnsygel Otleyns dez Chapplan vnd vnder Hainreichs dez wysinger jnsygel di zeyt Phleger zum Newhäws, die si durch vnser vleizzigen Pet willen an den Prief gehangen habent yn vnd iren erben an Schaden. So verpint ich mich ob genanter Peterll der Chapplan vnder meins lieben Pruder Jnsygel Porczleins des Chapplan vnd vnder der erbern la^eut jnsigel Otleins meins vetern des Chapplan vnd vnder Hainreichs des Wysinger jnsygel mit meinn Trevn an aydes Sta^ot alles daz staet ze haben vnd ze volfuren, daz oben geschriben stet. Der Prief ist geben, do man zalt von Christy gepurt drewzehen Hundert jar vnd in dem New^en vnd Sywencigistem jar am nachstem mitichen nach vnser frawen Tag zu der Schyedu^ong.

Source Fulltext: OÖUB 9 (Wien 1906), S. 678-679