Ich ffridreich der Wasnär, mein hawsfraw, vnd all vnser eriben veriehen offenleich vnd tu^en kund mit dem bri^ef allen den die in an sehent oder ho^erent lesen. Daz wir schuldig worden sein vnd gelten su^ellen dem weschaiden ffrantzen dem Aspekchen seiner hawsfrawn vnd allen iren eriben zway vnd vierczikch phunt gueter wienner phenning, Darumb wir in Recht vnd redleich geseczt vnd in geantwurt haben auz vnser nu^otz vnd gewer in di iren vnsrew Gu^et ze Seyfridso^ed mit allen eren rechten vnd nu^eczen also wir sy selber inne gehabt haben, Also mit der weschaiden, daz wir oder vnser eriben vollen gewalt haben, alle iar iärleichen her wider von in oder iren eriben ze lösen zw vnser ffrawntag ze Liechtmezze in den nagsten vierczehen tagen vor oder in den nagsten vierczehen tagen hin nach vmb di voruerschriben zway vnd viertzikch phunt gueter wienner phenning, di danne gib vnd gab sind. Wir su^ellen auch dez vorgenanten Sacz ir ffu^erstand vnd gewer sein, mit dem rechten an aller der stat, wo in sein not geschiecht, vnd also dez Lantz recht ist. Gieng sew awer fürbaz chainerlay chrieg oder stözz an, mit dem Rechten von dez obgenanten Satz wegen, den sullen wir in auz richten an allen iren schaden. Ta^eten wir dez nicht wittan schaden si dez nement, den ir ains vnberecht an ayd vnd vngesworen vnd an allew andrew wewa^ernu^ezz gesprechen mag, sein worten vnd trewn darumb ze gelauben, den su^ellen wi^er in trewleichen ablegen, abtu^en vnd mit sampt irem Hauptgut widercheren, auch sullen si den allen haben datz vns vnd vnsern trewn vnd darzw auf aller vnser Hab, wo wir die vberal indert haben oder lazzen inder landes oder auzzer Landes auf wazzer oder auf lant wesu^echt vnd vnwesuecht vor allen andern La^ewten vnd geltern vor auz. Auch waz wir da wider gein in Chriegten, Retten, Handelten oder taten, ez war mit recht oder an recht, gaistleich oder weltleich, daz süllens alles gein vns wehabt gewunnen vnd recht haben. vnd wir gein in verloren vnd vnrecht an alle widerred. Wer auch den brief mit irem gütleichem willen inne hat, fürpringt oder zaigt, der hat alle di recht di oben an dem brief verschriben stent angeuär. Mit vrchünd dez briefs, den wi^er in dar vber geben, versigelten mit meinem vorgenant Fridreichen dez Wasner aygen anhangundem Jnsigel vnd zw einer pezzern sicherhait vnd zewgnüzze mit der erbern meines Lieben Aydem Ruegern des Tewernar vnd mit meines lieben Öhaim Hainreich dez Cellar auz der Riedaw auch aygen anhangunden Jnsigelen, Di si vns peid an den brief gehangen habent, durch vnserr fleizzigen pet willen in vnd allen iren eriben an schaden. Dar vnder ich mich vorgenanter ffridreich der Wasner, mein hawsfraw vnd all vnserr eriben verpinten trewleich stat vnd vnzebrochen ze halten alles daz oben an dem brief verschriben stet angevär. Geben dez nagsten Phincztags vor sand Bartelmeus tag dez heyligen zwelifpoten, Nach Christs gepurd drewtzehen Hundert iar vnd dar nach in dem Näwn vnd Sibenczkisten Jar.

Source Fulltext: OÖUB 9 (Wien 1906), S. 679-681