Wir Pilgreim von gots genaden Erczbischof ze Salczburg, Legat dez Stu^ols ze Rom, veriehen — vmb die viertausent pfunt wienner pfenning, die wir dem Erwirdigen vnserm lieben frewnt, Hern Albrecht Bischofen ze Pazzaw, vnd seinem Gotzhaws daselbs, zu^e i^erm sichtigem nutz, vnd frum, von sunderr lieb vnd frewntschaft wegen, die wi^er zu^e in haben, berait gelihen haben, vnd der sew Drew tausent pfunt, vnd Sechshundert pfunt ze Lösung sein vnd seins Gotzhaws Vesst ze Matse, von dem Ahaimer, vnd die v^ebrigen virhundert pfunt zu^e anderm sein, vnd seins Gotzhaws ze Pazzaw nucz vnd frum angelegt haben, vnd dar vmb er vns vnd vnserm Gotzhaws ze Salzburg, mit gunst, vnd Gu^etem willen, seins Erwi^erdigen Capitels ze Pazzaw dieselben i^er Vesst Matze, mit aller i^err zu^egeho^erung, versaczt haben, wizzenleich, nach des briefs sag, den wi^er dar v^eber von in haben, also beschaidenlich, daz wi^er, vnd vnser nahcho^emen Erczbischof ze Salzburg, dieselb sein, vnd seins Goczhaws vesst Matze, mit allen eren, rechten, vnd nu^eczen, die dar zu^o geho^ernt, besu^echt, vnd vnbesu^echt, ausgenomen doch sein, vnd seins Goczhaws Lehenschafft, inne haben, niezzen, vnd nu^eczen su^ellen getrewlich vnd vngeuerleich. Swas auch an derselben i^err vesst ze Matze, ze pawn geschicht, daz ein redleich not durft ist, daz schu^ellen die egenanten Bischof ze Pazzaw vnd sein nahcho^emen pawn, angeuer, Der obgenante Bischof Albrecht ze Pazzaw, sein nahcho^emen, vnd auch i^er Capitel ze Pazzaw, ob zu derselben zeit sein Gotzhaws nicht Bischo^efs ze Pazzaw hiet, habent, auch ganczen, vnd vollen Gewalt, vnd recht, dieselb i^er Vesst ze Matze, vnd swaz dar zu^e geho^ert, von vns oder vnserm (!) Nach cho^emen, oder von dem Capitel vnsers Gotzhaws ze Salzburg, ob vnser Gotzhaws die selb zeit nicht Erczbischofs hiet, Ja^erleich zu^e dem Liechtmizz tag, vor oder nach, in den na^echsten vi^erczehen tagen, alain in i^er, vnd i^ers, Gotzhaws gewalt ze Pazzaw, vngeua^erleich ze lösen, vmb die vorgenanten vi^ertausent pfunt wienner pfenning, die dann gib, vnd gab sind, vnd nicht tewrr, der si vns dann richten, vnd bezalen su^ellen, in derselben i^ern Vesst Matze, an verpot, vnd an alle i^errung vngeuerleich, vnd an derselben losung su^ellen wi^er, noch niemant von vnsern, oder vnsers Gotzhaws wegen ze Salzburg, oder su^est in dhainen wegen, den obgenanten Bischof ze Pazzaw, sein nahcho^emen, oder i^er Capitel, ob dieselb zeit i^er Gotzhaws ze Pazzaw, nicht Bischof hiet, nicht i^erren, noch in su^ellen derselben Losung widersten, dhains wegs, an alles geuer, Es sol auch die obgenant i^er Vest Matze, sein, seins Gotzhaws, seiner nahcho^emen, vnd i^ers Capitels, ob die zeit, i^er Gotzhaws ze Pazzaw, nicht bischofs hiet, offens Haws, vnd gesloz sein, zu^e allen i^ern, vnd i^ers Gotzhaws chriegen, sto^ezzen, vnd notdu^erften, als oft in vnd i^erm Gotzhaws, dez not geschicht, getrewleich angeuer, vnd doch vns vnd vnsern nahcho^emen vnd vnserm Gotzhaws ze Salzburg ga^enczleich an scha^eden, Vnd dar v^eber ze vrchund geben wi^er den offen brief versigelten mit vnserm angetruckten Jnsigel, Der geben ist ze Salzburg; an nachstem Montag, vor sand Giligen tag, nach christi gepu^erd Drewczehen hundert Jar, darnach in dem newn vnd sibenczikistem Jar.

Source Fulltext: OÖUB 9 (Wien 1906), S. 690-691