Wir Albrecht vnd Leuppold zc. Bechennen vnd tu^on chunt offenlich mit dem brief, daz vnser getrewer lieber Ott von Zelking, mit vnser gunst vnd vnseren gu^otem willen, an sich geledigt vnd erlöset hat von vnserm getrewn lieben Jörgen von Walsse vnser vesten Newemburg auf dem Jn, Pernstain vnd Newenfels vnd waz dar zu^o gehört vnd auch Valkenstein mit aller zu^ogehörung, wie das genant ist, vmb fünf Tausent phunt wienner phenning, dar vmb si des egenanten von Walsse Satz von vns vnd vnserm lieben bru^eder Herczog Ru^odolf selig gewesen sind, nach sag der Saczbrief, die er von demselben vnserm bru^eder gehebt vnd die er vns wider gegeben hat, Vnd dauon sullen nu fürbaz der egenant von Celking, vnd sein erben die vorgenanten vnsere vesten mit allen nuczen vnd rechten, eren vnd wirden, alz die von alter da her chomen sind, von vns vnd vnsern erben in eins Rechten werenden phandes weis, an absleg der nucze, Jnnehaben vnd niessen als Lang vncz daz wir, vnsere erben vnd Nachkomen Si der obgenanten fvnf Tausent phunden genczlich berichten vnd geweren. Wir verhaissen auch für vnsselber vnd vnser erben, daz wir si da nicht enthausen sullen noch wellen in dhain wegen, Si werden denn vor der egenanten phenning gancz vnd gar bericht vnd beczallt. Si sullen vns auch der losung stat tu^on, Wenn wir si mit den egenanten V.M. Pf. wienner phenningen, mit eynander vnd nicht zu Ainczigen ermanen ane geuer. Vnd swenn wir si derselben phenning also bericht haben, So sullen vns vnd vnsern erben, die egenanten vnsere Vesten mit aller irer zu^ogehörung ledig vnd loz sein. Es sol auch der vorgenante von Celking von Schönegg vnd sein erben oder wer dieselben Vesten von irn wegen innehat, vns vnsern erben vnd Nachkomen damit wartend vnd gehorsam sein, Wider allermeniklich vns vnd die vnsern darin vnd darauz ze lassenn vnd auch darinn ze enthalten swenn vnd wie offt vns des not beschikt (!) an irn merklichen schaden. Sy mugen auch die vorgeschriben V.M. Pf. auf den egenanten Phendern mit vnserm gu^etem willen, durch frevntschaft willen, schaffnen, orden vnd geben ir freund ainem oder wem si wellent, der vnsern ainem, der vns vnd vnsern Land zugehöre, Also daz derselbe die obgenant Summe geltes, auf den egenanten vesten haben sol in phandes weis mit allen den pvnten vnd artikeln die davor geschriben stent, an geuer. Vnd des ze vrchund geben wir disen brief versigelt mit vnsern Anhangunden Jnsigeln. der geben ist ze Wienn an sand Margarethen tag Anno domini zc LXX nono.

Source Fulltext: OÖUB 9 (Wien 1906), S. 663-664