Wir Albrecht von gots genaden Herczog ze Österreich, ze Steyr, ze Kernden, vnd ze Krayn, Graf ze Tyrol etc. Tün kunt, als wir vnser vesten vnd herschefte, Frankenburg, vnd Atersee verseczt haben vnserm lieben getrewen, Hainreichen von Walsse, vnserm houbtmanne ob der Ens, vmb ein egenant gelt, nach seiner briff sag, also, das er dy von dem von Cili, der sy yczund inne hat, auf den schirist chünftigen sand Jacobstag innemen sol, haben wir dem selben von Walsse gelobt, Vnd loben auch, Were, das von den selben vnsern Herscheften dhain dinst, der auf den vorgeschriben Sand Jacobs tag oder darnach geuallen sol, vor der selben czeit abgenomen wurde, das wir im oder seinen erben das erstatten vnd widercheren sullen aus vnser Kamer. Mit Vrchund dicz brifs, Geben ze Wienn, am freytag nach dem heyligen auffart tag Anno domini Millesimo, Trecentesimo, Septuagesimo, Nono.||
dominus dux per dominum Jo(hannem) de T(yerna).

Source Fulltext: OÖUB 9 (Wien 1906), S. 638-639