Ich Christan von Rorr vnd Wendel mein Hawsfraw vnd all vnser Erben veriehen Offenbar an dem brief vnd Tu^on chunt allen den die in sehent oder horent lesen, die nu lebent oder her nach chünftig werdent, daz wir Recht vnd redleich gegeben haben vnsers Rechten aigen Chaufgücz durch vnsern willen vnd vnsern Vodern vnd nachchomen Sell Hail willen, ein gut gelegen in Chirchtarffer pharr, da zu den zeiten Vlreich der Stubhan auf gesessen ist, vnd da man Jerleich von dient an ainen Sibenthalben schilling phenning, das güt vnd daz gelt hab wir Recht vnd redleich gegeben vnserm pharrer Hern Niclan ze Wienn vnd allen seinen Nachchomen vnd pei dem Gotshaus Ewichlich ze peleiben vnd schol auch der vorgenant Her Nicla pharrer dacz sant Stephan vnter Lewnstain gelegen von dem Egenanten güt, er noch sein Nachchomen Chain Stewr nicht nemen, denn Newr (!) seinen Rechten dienst, vnd schol auch ich Christan von Rorr vnd all mein Erben des Vorgenanten gücz scherm vnd gewer sein für all ansprach alz aigens Recht ist vnd des Landes Recht ob der Enns, vnd schol man vns vnd vnsern Erben all Jar Jerleich von dem güt ze vaschang diennen zwai Vogt Hüner vnd nicht mer, wann wir des gücz ich vnd all mein Erben Erbvogt schullen sein, Also peschaidenleich, daz der Egenante Her Nicla ze Lewnstain pharrer dacz sant Stephan vnd all sein nachchomen da von Jerleich pegen schullen in den achtagen nach aller Heiligen Tag aines abencz mit ainer gesungen Vigilj vnd des Margens ain gesunges Sellampt vnd ain Mess von vnser fräwn gesprochen vnd ain Mess von dem Heiligen Herrn sand Stephan der Hawpt Herr in dem selben Gotshaws ist. Wär auer, daz der Vorgenante Her Nicla pharer dacz sand Stephan Oder sein nachchomen des Vorgenanten göts dienst nicht Volfürten, alz Oben an dem brief geschriben stet, So schol ich Vorgenant Christan von Rorr Oder mein Erben des gu^otz vnter winten, alz lang huncz (!) der Vorgenant Her Nicla Oder sein nach Chomen allen gotsdienst Volfürten, der vor versäumt ist vnd schol man in daz güt dar nach wider geben vnuerzogenleich. Daz die Red vnd die Wandlung stet vnd vnzerbrochen peleib, dar über gib ich Vorgenanter Christan von Rorr vnd all mein Erben den brief versigelt mit meinem anhangentem insigl, der sach sind ziug mein lieb Öham Härttneit von Losenstain vnd Peter von Losenstain mit iren anhangenten insigel. der brief ist geben nach Christus gepurd drewczehen Hundert Jar dar nach in dem Newn vnd Sibenczgistem Jar des nasten Sampcztags nach dem Heiligen Aüffert Tag.

Source Fulltext: OÖUB 9 (Wien 1906), S. 639-640