Wir Johanns Lantgraue zum Lewtenberg. vnser Hawzfraw vnd all vnser Eriben vnd nachkomen Bekennen offenlich mit dem brif. Daz wir vnz gütlich vnd frewntlich verricht vnd veraint haben auf ein gancz end, mit dem Edeln wolgeborn Graf Hainrich zü Orttenberch, mit frawn angnes seiner Hawzfrawn Gräfinn zu Orttenberch, mit Graf Alram, Graf Go^ergen, Graf Uetzel geprüder ir sün Grafen da selb iren Hawzfrawn vnd alln iren eriben vnd nachkomen. vmb all awflawff. Stözz. zwayung. misshelung vnd voderung di zwischen vns vnd ir gewesen sind, wi di genant sind, oder wi sich di verlawffen habent biz auf den Hewtigen tag. Also. daz wir vnser Hawzfraw vnd all vnser eriben vnd nachkömen. hincz dem egenanten Graf Hainrich zü Orttenberch, frawn Angnesen seiner Hawzfrawn Gräfinn zu Orttenberch. Graf Alram. Graf Gorgen Graf Weczl geprüder iren sünen. iren Hawzfrawn vnd allen iren eriben vnd nach kömen vnd besunderlich hincz den Herschafften Lenberch. Pawngartten. Tann. Harbach. Gänchouen auf der Pwnnach vnd hincz dem Hof zu Mämmyng mit dem zehent als den ieczw Ott der Pölnchouer inne hat vnd hincz allem dem daz darzü gehört. Lant vnd Lawten dhainerlai ansprach noch voderung nymmer mer dar nach gehaben sullen noch mügen mit recht noch an recht gaistlich noch werltlich in dhain weiz. Auch sol der egenant Graf Hainrich zü Orttenberch, sein Hawzfraw, ir eriben vnd nach kömen, hincz alle dem daz der Edel wolgeborn Graf Lewpolt von Hals seliger vnser liber Ohaim hinder im gelazzen hat. wi daz genant ist, oder wo daz gelegen ist, nichts ausgenomen, dhainerlay ansprach noch voderung dar nach nymmer mer gehaben, noch gewinnen Jn dhain weiz. dann hincz den obgenanten Herscheften. Mit vrkünd dez brifs versigelt mit vnserm anhangunden Jnsigel. vnd mit dez Hochgeborn fürsten vnd Herrn Herrn Fridrich von gotez genaden Pfallenczgraue pei Rein vnd Herczog in Beyern vnsers genedigen Hern anhangunden Jnsigel, der ez zu einer zewkchnüzz vnd gedachtnwzz zu sambt den vnsern. nach vnserr fleizzigen pet willen an den brif gelegt hat, im, seinen prüdern vnd allen iren Eriben vnenkolten vnd an schaden. allez daz stät zw haben vnd zu volfürn daz an dem brif verschriben ist, trewlich an geuär. Der geben ist zü Teispach nach Christi gepürtt Drew czehen Hundert Jar vnd dar nach in dem Newn vnd Sibenczigistem Jar an Montag vor Sand Lucein Tag.

Source Fulltext: OÖUB 9 (Wien 1906), S. 764-765