Ich Ott der Städler vergich, — Das ich — Hab — verchaufft vnd verlichen meinen Hoff genant an dem viertael Hof gelegen in Hager pharr dem weschaiden manne Andre vnd seiner Hausfrawn Gedrautten vnd ir paeder erben — zw rechtem erbrecht vnd zw allin (!) dem rechten vnd des Gotshaws guet vnd aygen recht hat von Babenberg zw hag in der Hofmarich vnd auch mit alli dew vnd dar czw gehört, — vm Sechczehen phu^ont alter wienner phenning, der ich vnd mein erben van in gancz vnd gar verricht vnd wezalt sein zw rechten tegen an all scheden vnd wem der vorgenannt Andre sein Hausvraw vnd ir erben den egenanten Hoff verchauffent oder versetzzent, wer derselbe ist, es sey fraw oder mann, wie dy mit dem taufnämen gehaezzen sein, der sol mit dem gegenbürtigen brief alle die recht haben, dy in dem brief verschriben sind, von mir vnd all mein erben vnd vnsern nach komen, also weschaidenlich das sew vnd ir nach komen mir mein erben vnd vnsern nachkomen alle jar jerleich von dem egenanten Hoff raechen vnd dienen sullen zw rechtem dinst aen phunt alter wienner phenng an vnser vrawen tag zder dinst zeit vnd aen phunt zw rechter Stewr an vnser vrawen tag in der vasten vnd zw weynachten aen ervng dy zwainzig wienner phenng wert sey, vnd svllen auch all iar auf dem Hoff zw Aychperg helffen zw tüngen mit der gemay^en vnd mit andern vnsern Holden als gebondlich ist vnd als offt ein wandlung da geschiecht mit verseczzen vnd verchauffen, so geit man vns dreizzig wienner phenning zw anlait vnd als vil zw ablait vnd chainer vaderung mer. Auch pin ich Ott der Städler — ir schermer vnd gewer zw Hoff vnd zw tayding, swo in des not vnd durfft geschiecht, in dem lande ze O^esterreich vnd das in die Red vnd wandlung von mir vnd meinen Erben vnd von vnsern nachkomen stet vnd vnuerchert beleib, Dar über zw eynem waren sichtigen ürchund, Gib ich vorgenanter Ott der Stadler Jn den offen brief versigelt vnd wolbestetigt mit meinem anhangunden Jnsigel, vnd hab auch gepeten meinen lieben nasten vnd pesten frewnt Otten den Stadler auf dem Aygen, das er dy sach bestetigt vnd wezeugt hat mit seinem anhangundem Jnsigl, im an scha^oden, vnd danach hab ich gepeten den Erbern vesten Ritter Herrn Vlreichen von Rärbach die zeit vogt zw Hag, das er der sach auch zewg ist mit seinem anhangundem Jnsigel im vnd seinen erben anschaden. Der brief ist geben nach Christi gepürd Drewczehen Hundert jar vnd darnach in dem na^ewn vnd sybenczisten jar an phingstag sant Mertens abent.

Source Fulltext: OÖUB 9 (Wien 1906), S. 737-738