Ich Haug von Dibein vnd ich Jorg von Weissnek, gepruder, wir veriehen — das wir den Erbern Ritter vnsern lieben frewnt, Herren Jörgen den Awersperger vnd all sein Erben ze willigen Pürgeln vnd selbgescholen versaczt haben hincz vnserm getrewm dynär, Herren Hansen von Czekorn vnd allen seinen Erben vmb achthundert guter guldein vnd Czwen||
vnd Sechczikch guldein die dy wag wol habent, vnd Achczikch phunt wienner phenning, die wir genczlich vnd gar von in enphangen haben, der wir si Richten vnd wern süllen als vnser||
prif lawt den si von vns darumb habent, Loben wir dem vorgenanten Herren Jörgen vnd allen seinen Erben, das wir si von der vorgenanten geltschullt vnd Pürgelschaft genczlich vnd||
gar ledigen vnd nemen süllen an allen iren schaden. Teten wir des nicht, swelhen schaden si dann des nemen, — den sullen wir in genczlich vnd gar gelten vnd ablegen, —. Vergessen wir vns dar an indert, So sullen si dy Hochgeborn fürsten vnser genedig Herren die Herczogen von Österreich oder ir anwalt Erkchens vnd Schadens genczlich vnd gar Richten vnd wern von aller vnser Habe, —. Mit vrchund dicz prifs versigelt mit vnser payder anhangenden Jnsiglen. zu einer geczewgnüsse der Warhait, Geben ze Sanosecz Nach Christs gepürd Drewczehen Hundert Jar darnach in dem Achczigistem Jare an Vreytag vor Letare in der Vasten.

Source Fulltext: OÖUB 9 (Wien 1906), S. 807