Wir Hainrich von Rosenwerg der Jung herrn vlrichs von Rosenwerg Sun vnd vnser hawsfraw Barbara des Edlen Wolgeboren vnsers Heben Swechers Graf hainrichs von Schawnberg tochter vnd all vnser Erben vnd nachkomen Bekennen vnd tu^en kund offennlich mit dem brief allen den, die in sehent, horent oder lesennt, das vns vnser egenanter Swecher vnd vatter zw heirattgutt geben hatt zway tausent phunt phenning zw der vorgenanten seiner tochtter vnser wirttin vnd der er vns gar vnd gantzlich an allen vnsern schaden verricht vnd bezallt hatt, Darumb wir vns alles Eribtails verzigen habenn vnd verzeichen auch vns des gantzlich mit dem brief, den wir bey den obgenanten vnsern lieben Swecher vnd vatter mitsambt andern vnsern geswistradten gehabt haben, wie das alles genant oder gehaissen ist, besucht vnd vnbesucht Also, das wir noch vnser Erben vnd nachkomen kain ansprach noch vordrung darnach Nymermer gehaben noch gewinnen sullen noch wellen mit recht oder an recht, wir noch ander yemant von vnsern wegen in kainerlay weis mit der beschaiden, Ob das wa^er, das vnser vorgenanter lieber swecher vnd vatter an leiblich Eriben, das Su^en wa^eren, von todes wegen abgiengen, da gott vor sey, oder wie das geschach, das dj herschafft, dj vnser obgenanter Swecher vnd vatter hinder Jm lief Eriblos vnd das kain rechter Erib mer darzw wa^er, das Su^en sind, dj von Jm oder von seinen Su^en komen waren, so sullen wir gleichen Eribtail haben vnd Eriben mit andern vnsern Swestern angeuar, vnd daruber zu ainem Waren vnd statten Vrkund gebem wir dem obgenanten vnserm lieben swecher vnd vatter dem Edln wolgeboren graf hainrichn von schawnberg vnd allen sein Eriben den brief versiglt mit vnsers obgenanten Graf¹⁾ hainrichs von Rossenberg vnd vnser obgenanten Wirttin frawn Barbara anhangunden Jnsigln, Der geben ist zw Schawnnberg Nach kristi gepurdt drewzechn hundertt Jar darnach jn dem Achtzigistenn Jaren an Suntag, do mann Singett Judica in der Vastenn.

Source Fulltext: OÖUB 9 (Wien 1906), S. 816-817