Wir vlrich petter vnd Johanns gebrueder von Rosenberg vnd wir hainrich von Rossenberg des egenanten herrn vlrichs Sun vnd all vnser Eriben veriechen offenlich mit dem brief, Das der Edl wolgeborenn vnser lieber Swecher graf hainrich von Schawnnberg gesatzt hatt sein statt ze Euerding mit aller zuegehorung vnserm egenanten Sun Hainrichen von Rossenberg fur Tausent phunt gutter wienner phenning, dj der obgenant vnser swecher zw rechtem heiratgutt geben soll zw seiner tochter Junckfrawn Barbaren dem vorgenanten vnserm Sun hainrichen Also beschaidenlich, das der egenant vnser Swecher graf hainrich von Schawnberg vnd sein Eriben vollen gewallt haben den vorgeschriben Satz zulosen alle Jar Jarlich, auf welhe zeitt vnd auf welhen tag jm Jar sy des verlust an alle Jrrung vngeuerlich vmb dj vorgenantenn tausent phunt wienner phenning. War aber, das in oder iren Erben dj losung in kain wegen von vns vnd vnsern Erben verzogen wurden, wie sich das fuegt, was Sy des schaden Namen, wie der schad genant ist, den ir ains gesprechen mag an aid vnd vngesworen, denselben schaden zw sambt dem haubtgutt lobm wir in aus¬richten vnd widerkerenn vnd sullen sy das haben datz vns, vnsern trewn vnd darzw auf aller vnser hab, dj wir haben, besucht vnd vnbesucht, wie dj genant oder wo dj gelegen ist. Mit vrkund des briefs versigelt mit vnserm anhangunden Jnsigeln, Das geschechen ist Nach kristi gepu^erd drewzechenhundertt Jar vnd darnach in dem achtzigistenn Jar an Suntag, do man singett Judica in der vasten.

Source Fulltext: OÖUB 9 (Wien 1906), S. 817-818