Ich Wysent von Pach vnd ich anna sein Hausuraw vnd all vnser erben veriehen offenleich mit dem prief vnd tu^en chunt allen den dy in sehent, hörent oder lesent, Das wir mit wolbedachtem müt vnd nach rat vnd weysung vnser na^echsten vnd pesten frewnt dy czeit do wir es mit recht wol getun machten Recht vnd redleich versaczt haben Larenczen des Nürnberger aydem purger ze Enns vnd seiner Haufurawn vnd allen i^eren erben. Vnser vi^ertail das wir gehabt haben an dem Hof genant der Zyperhof gelegen im Mos in Ennser phar vnd das vnser recht lechen ist von vnserm gena^edigen Herren Hern Hanss von Volkchenstorf von Chrewczen, das haben wir in versaczt mit Herren hant vnd mit aller sta^et mit allen eren nu^etzen vnd rechten dy zu dem obgenanten virtail geho^erent wye dye genant sind versu^echt vnd vnuersucht vnd was do von bechomen mag vnd als es von alter her chomen ist aws vnser nutz vnd gewer in i^er nutz vnd gewer, Vmbe Zwelif phunt wienner phennig der wir von in gancz vnd gar verricht vnd gewert sein an all vnser schaden. Wir haben auch vreye wal das obgenant vi^ertail an dem obgenanten Hof von in her wider ze lo^esen vmb dy obgenanten zwelif phunt phennige acht tag vor dem Ostertag der nu schi^erist chu^empt vnd acht tag hin nach. Tu^en wir des nicht, So schol das obgenant virtail an dem obgenanten Hof i^er rechts gechauffts gu^et sein, also beschaidenleich das wir vns ainen erbern man dar vmb nemen schullen vnd sew ainen man nemen Vnd was dy paid von iren trewn dar vmb ervindent vnd sprechent, was sew vns her zu geben schullen da schol es pei beleiben an alle widerred vnd an alles geua^er. Wi^er schu^ellen auch des obgenanten virtails an dem obgenanten Hof, ze satz, als an dem prief geschriben stet, i^er recht gewern vnd fürstant sein an aller stat do in des not vnd dürft geschiecht als satzes vnd recht lehens recht ist in dem Lannd ob der Enns. Gi^eng in aber dar an icht ab mit recht wiegetan schaden sy denn des na^emen, dy i^er aine (!) pei seinen trewn gesprechen mo^echt an ayd vngesworen vnd an recht dy selben scha^eden schu^ellen wi^er in mit sampt dem obgenanten Haubtgu^et gancz vnd gar ab legen vnd wider cheren. Vnd schu^ellen sew das alles haben auf vns vnd auf vnsern trewn vnd dar zu^e auf aller vnser Hab wo wir dy haben versucht vnd vnuersu^echt, Vnd mu^egen des alles do von bechömen an chlag vnd an recht mit vnserm gu^etleichen willen. Vnd des zu ainem waren vnd stäten v^erchunt geben wir in den prief versigelten vnd wol besta^ett mit meinem obgenannten Wysents von Pach anhangunden Jnsigel, Vnd zu ainer waren geczewgnüzze mit des erbern mannes Maricharts des Prästleins dy zeit des Rats ainer ze Enns anhangundem Jnsigel der da mit geczewg ist durch vnser vleizzigen pet willen im vnd seinen erben an schaden. Der prief ist geben do man zalt von Christi gepurd drew czehen Hundert Jar vnd dar noch in dem Achtzkisten Jar an sand Gregorigen tag in der vasten.

Source Fulltext: OÖUB 9 (Wien 1906), S. 818-819