Wir vlrich von Rosenberg, Wir Hainrich sein Sun vnd all vnser Erben veriechen vnd tun kundt mit dem brief allen den, dj in sechent, horent vnd lessen, das vnns der Edl wolgeborenn vnser lieber Swecher Graf hainrich von Schawnberg gantzlich an allen schaden gewertt hatt Zwaytausent phunt phenning, die er vns vorgenantem hainrich von Rosenberg ze rechtem heiratgutt zw seiner tochter Barbara hatt geben, Der hatt er vns mit beraitem gelt bezallt Tausennt phunt phenning, die er vnns beraitt gelichen hatt, Ob das beschach, das wir Obgenanter hainrich von Rosenberg mit dem tod abgiengen, da gott lanng vor sey, vor der obgenanten Junckfrawn Barbara vnser gemachl, das wir diselben Tausent phunt anlegen auf stuck vnd gueter, do es dj egenant vnnser gemachl ir lebtag wisse ze vinden vngeuerlich. Dan vmb dj andern tausennt phunt hatt er vns ingeantwurtt vnd gesatzt sein statt zw Euerding mit aller Zugehorung, als dj brief weisent vnd sagen, dj wir von in darumb haben, veriechen wir auch: wan der egenant vnser Swecher graf hainrich von Schawnberg oder sein Erben dj egenanten Statt Euerding von vnns vnd vnsern Eriben losen vmb tausent phunt phenning, als der satz brief lawtt, den wir darumb haben, so sullen wir dj selben tausent phunt phenning, Ob es zu schulden ka^em, als obengeschriben stett, auch auf stugkch vnd guter anlegen Nach frewndt Ratt, da sy auch vnser egenante gemachl wisse zusuchen vnd volligklich gehaben mu^eg auch angeuer. Mitt vrkund des Brief, Der Geben ist ze Sobieslaw Nach kristi gepurd drewzechenhundertt Jar vnd in dem Achtzigisten Jar des phintztags Nach dem Suntag, als man singett Judica in der vasten.

Source Fulltext: OÖUB 9 (Wien 1906), S. 822