Ich Wernhart der Perger purger ze Freinstat vnd ich anna sein hausfraw vnd all vnser erben, Wir veriehen offenleich mit dem brif daz wir mit wolbedachtem mu^ot, vnd nach rat vnser nechsten vnd pesten vreunt zder zeit do wir ez mit recht wolgetu^on mo^echten Rechtt vnd redleich verchau^oft haben, auf vnserm Haws daz vnser freys pu/archrecht ist zder freinstat gelegen in der spindelgazzen ze na^echst dez bru^enner Haws dreizzik wienner phennig ewigs gelts nicht abzelösen vmb einen gelt, dez wir gar vnd gancz verricht vnd gewert sein ze rechten tägen an allen schaden, den Erbern weschaiden pekchen chnechten in der freinstat in ir zeche, Mit ausgenomer red, daz wir in ierleich do von raichen vnd dienen schullen in ir zeche dreizzik wienner phennig gelts oder swer daz egen(ant) Haws nach vns besiczet, vnd schu^ollen auch anheben ze dienen ze vnser vrowntag zder Lichtmesse der schirist chu^omt. Wär awer, daz wir in den egen(ant) dinst verzu^ogen, so habent si fu^erbaz recht vnd vollen gewalt vnz ze beno^etten vnd ze phenden mit vnsserm gu^etleichen willen auf aller vnser hab, ez sei erbgu^ot oder varund gu^ot. Wi^er sein auch vnuerschaidenleich der egen(ant) dreizzik wienner phennig gelts auf vnserm egen(ant) Haws ir rechtt gewern vnd fürstand ze ho^ef ze taiding für all ansprach alz purchrecht zder freinstat recht hat. Ging in daran icht ab mit recht, wittan schaden si dez nemen oder wi der schade genant ist, den ir ains vnbrecht vnd an aide pei seinen trewn gesprechen mag, denselben schaden schu^ollen wir in genczleich ablegen vnd widerchern vnd schu^ollen si daz haben auf vns vnd vnßem trewn vnuerschaidenleich auf aller vnser Hab, di wir haben, wo wir di haben auf wazzer oder auf lande vnd schu^ollen vns dor auf phenden vns vnd di vnßern dor vmb auf haben in steten in panmerkchten alz ver vncz daz si haupgut dinst vnd schaden gar vnd ga^enczleich da von verricht vnd gewert werden, Daz lu^oben wir in allez ze laisten mit vnsern trevn an aides stet. Vnd dez ze vrchu^ond geben wi^er in den bri^ef versigilten mit der Erbern stephan dez gu^olher zder zeit stat richter zder freinstat vnd Thomans dez Swantter purger doselbs, aigen anhangunden Jnsigiln, die si durch vnser vleizzigen pet willen an disen brif gehangen habent ze einer waren vrchund vnd zevgnuss der sache in vnd iren erben an schaden, dar vnder wir vns verpinden mit vnßern trewn an aides stat allez daz stet ze haben daz vor an dem brif geschriben stet, wand wir di zeit nicht aygen Jnsigil enhaben. Der brif ist geben nach Christi gepürd drevczehenhundert dar nach in dem achtczigisten iar, dez phincztag vor sand aytten Tag der heyligen Junchvrown.

Source Fulltext: OÖUB 9 (Wien 1906), S. 795-796