Dem Allerdurleuchtigisten Hochgebornen fursten vnserm lieben genedigen Herren vnd Swager, Hern Wenczlawen Römischen Kunige, zu allen zeiten Merer des Reichs vnd Kunige ze Behem. Embieten Wir Albrecht von gotes gnaden Herczog ze Österreich ze Steyr ze Kernden vnd ze Krain, Herre auf der Windischen Marich vnd ze Porttenaw, Grafe ze Habspurg, ze Tyrol, ze Phirt, vnd ze Kyburg, Marggraf ze Burgow vnd Lantgraf ze Elsazze, vnsern sta^eten willigen dienst mit ganczen trewen. Alz wir vnd der Hochgeborne furst vnser lieber Bru^eder Herczog Leupolt, vnsere Land vnd Herscheffte, willicleich mit eynander getailet haben, vnd vmb gema^echtnüsse derselben Landen vnd Herscheffte bru^ederlich vberain komen sein, nach sag der tail briefen vnd gema^echtbriefen, die wir baidenthalben daruber gen eynander geben haben. Bitten wir mit allem fleiss vnd ernste, alz wir euch auch vormalz mit vnsern erbern botscheften vnd briefen gebeten haben, daz ir dieselben tailung vnd gema^echtnüsse, vnd auch die briefe, die daruber geben sind, geru^ochet besteten. So sol das, ew vnd vns, vnd auch vnser baider Erben an der Puntnüsse vnd gema^echtnusse, die zwischen vns vormalz beschehen sind, kain schad sein, vnd sullen die Hantuest vnd brief, die zu beder seit daruber geben sind, dennoch bei iren kreften gencziclich beleiben, an allez geuer. Mit vrchund dicz briefs. Geben ze Wienn an Mitichen vor dem Prehemtag. Nach kristes geburt Dreuczehen Hundert Jaren, darnach in dem Achczigisten Jare +

Source Fulltext: OÖUB 9 (Wien 1906), S. 772-773