Wir Albrecht von gots gnaden Herczog ze Österreich, ze Steyr, ze Kernden vnd ze Krain, Graf ze Tyrol etc. Embieten den erbern geistlichen vnsern lieben, andechtigen, allen Preleten, vnd allen herren, Rittern vnd Chnechten, von den vnser Purger ze Steyr lehen habent, vnser gnad, vnd alles gu^ot. Wir haben vernomen, wie ir von derselben ünserer purger ze Steyr holden vnd gütern, die si von ew ze lehen habent, Stewr haben, vnd nemen wellet, dauon in ire güter wüst werden möchten, das vns nicht pillich dunchet. Dauon emphelhen wir ew, vnd wellen gar erenstlich, das ir Si der vberhebet, vnd chain Stewr von in nemet, noch vordret, oder ir ta^etet dar an gar swerleich wider üns, wann üns die vorgenanten vnser Purger, von aller irer hab ierleich stewern müzzen. Geben ze Ens, an Eritag vor Sand Pauls tag, als er bechert wart, Anno domini. Millesimo. CCCmo. Octuagesimo. D.(ominus) D.(ux).

Source Fulltext: OÖUB 9 (Wien 1906), S. 789