Jch chunrat von Velden etben Richter daselbs vergich Offenleich mit dem prief vnd Tun chunt allen den, dy in sehent, ho^erent oder lesent, Daz ich dem Edeln wolgeparen meinem genaedigen herrn Graff Hainrich von Scho^eunberch vnd seinen czwayn Su^enen verhaizzen vnd versprochen han mit mein trewen, daz ich in vnenpfaren zu velden schol sein, dy weil sy den selben Marchkt in habent. Wa^er aber, daz ich daz vber fuer, so schol ich meinen genanten herrn Leibs vnd gu^ecz verfallen sein vnd schol mier dann mein herr her Gundachker von Tannberch vnd Nyclas meiner Herren Schaffer von Rosenwerch vnd mein pruder hensel von Velden alz vast nach seczen, alz mein vorgenantt gena^edig herren, wo sy mich wegreiffen mugen. Vnd dar vber gib ich den prief versigelt mit meinem vorgenanten chunrats von velden anhangunden Jnsygel vnd zu einer pezzern sicherhait vnd waren czewgnu^ezz mit meines herrn hern Gundachker von Tannberch vnd mit Nyclas meiner herrn schaffer von Rosenberch vnd meines pruder Hensleins von Velden anhangunden Jnsygel, dy sy durch meiner Vleizzigen pett willen an den prief gehangen habent in vnd all i^ern erben an schaden. Der prief ist geben nach christ gebu^erd drewczehen hundert iar, dar nach in dem Achczigisten iar dez Samcztags nach sand Pawls Tag.

Source Fulltext: OÖUB 9 (Wien 1906), S. 792-793