Ich Erhart der Vleischhakcher von sannd Peter mein Hausvraw vnd all vnnser erben, Wir vergehen —, daz wir — verchauft haben. Dem erbern mann Meriten dem Straussen purger ze Gretz seiner Hausvrawn vnd allen irn erben, vnser Halbew Hu^eben gelegen ze Messenndorf an dem Puhel, gen dez Comitewr Hub vber, vnd die ze lehen ist von dem edlen Herren Hern Otten von Stubenberg. Wir sullen in auch die vrlawben vnd richtig machen ynner Jars vrist mit dez obgenanten Herrn Otten von Stubenberg Hannt, gunst vnd gutem willen, von dem si ze lechen ist an allen irn schaden vnd mue, Vnd haben in auch di vorgenantew halben Hüb mit aller zugehörung verchauft vnd in geantwurtt in nucz vnd in gewer mit dem Prief mit allen den rechten vnd nuczen di dar zü gehorend, —vmb Achczehen phunt guter winner phenning, Der wir gennczlich von in gericht vnd gewert sein, Wir loben in auch di obgenant halbe Huben mit aller zugehorung furbaz getrewleich scherm vor aller ansprach, nach chaufs vnd Lechens recht in dem Lannd zu Steyr. Tun wir dez allez nicht, welhen schaden sew dez furbaz nemen hincz kristen oder hincz Juden mit chlag oder mit tayding oder wi der schaden genant wer, —den loben wir in gennczlich abzelegen, vnd sullen sew daz haben auf vns auf vnserm güt auf alle dew vnd wir haben, ez sey Erb oder varund gut vnd schol sew davon richten vnd wern vnser Herschaft, Wer aber die daran sawmig so schol ez tun der Lanndes Herr in Steyer oder wer an seiner stat gewaltig ist wo sew darauf weysent an chlag, an tayding. Vnd dez zu vrchund geben wir in den prief versiglten mit dez obgenannten Herrn Otten von Stubenberg obrister Schenkch in Steyr anhangundem Jnsigel den wir vleizzleich dar vmb gepeten haben im vnd seinen erben an schaden, Dar vnder wir vns verpinden allz daz stet ze haben alz oben geschriben ist.||
Geben nach Christi gepurd Drewczehen hundert Jar vnd in dem achczigistem Jare dez Montags nach sannd Gallentag.

Source Fulltext: OÖUB 9 (Wien 1906), S. 892-893