Ich Erhart der Vleischakcher von sannd Peter, mein Hausvraw vnd all vnnser erben wir vergehen —, daz wir — verchauft haben, dem erbern mann Mertten dem Straussen Purger ze Gretz seiner Hausvrawn vnd allen iren erben vnnsrew aygen Halbew Huben, gelegen ze Mezzendorf ze nechst an dez Phuntens Hüb. Wir haben in auch dieselben Halbew Huben mit aller zugehörung verchauft vnd ingeantwurtt in nutz vnd in gewer mit dem prief mit allen den rechten vnd nuczen di dar zu gehörnd —, Vnd darvmb habent sew vns geben zwai vnd zwainczig phunt guter wienner phenning, der wir gennczlich von in gewert sein. Auch loben wir in dieselben egenante halbew Huben mit aller zugehorung furbaz getrewlich Schermen vor aller ansprach nach chaufs vnd aigens recht in dem Lannd ze Steyr. — vnd des ze vrchund geben wir in den prief versiglten mit dez edlen Herren Graf Hainreichs von Sulcz Comitewr dez Tewtschen haus ze Grecz am Lee, vnd mit dez erbern Petern dez Hinderholczer verweser ze Grecz mit ir paider anhangunden Jnsigln, di wir vleizz(ig) darvmb gepeten haben, dem obgenanten Graf Hainreichen von Sulcz an schaden vnd dem egenanten Petern dem Hinderholczer seiner Hausvrawn vnd irn Erben auch an schaden darvnnder wir vns verpinden allez daz stat zu haben alz oben geschriben ist, Geben nach christi gepurd Drewtzehen hundert Jar vnd in dem achczigistem Jare dez Montags nach sannd Gallen tag.

Source Fulltext: OÖUB 9 (Wien 1906), S. 891-892