Wir Vlreich, Johanns vnd Heinrich von Rosennberg vnd Heinrich der Elter vom Newnhaus, Bechennen mit disem brief, daz wir mit dem Hochgeborn fu^ersten Herczog Albrecht zu O^esterreich vnd allen seinen Helffern, Einen rechten frid vncz auf daz New Jar, das schirist chümt, den selben tag gancz vnd gar mit allen vnsern Helffern getrewleich an alles geuerd haben wellen vnd wellen (!), Waer aber, des got nicht engeb, daz icht geschaech, da mit dem vorgenanten Herczog Albrecht deucht daz der frid ze brochen würd, So schullen wir vmb di selben sache, vor vnsern Herren den Römischen vnd Behemischen Chünig chomen vnd schüllen da mit tu^on alles das swas er erfindet, Vnd das geloben wir mit vnsern trewn bey vnsern eren in aydes geweys, daz wir daz alles, alz ez oben geschriben ist, staet halten schüllen vnd wellen, Vnd des czu urchund geben wir vnsern brief versigilten mit vnsern anhangunden Jnsigiln, der gegeben ist, so man czalt von Christi gebürd drew czehen Hundert Jar vnd dar nach in dem achczigistem Jar, des phinstags vor Symonis vnd Jude.

Source Fulltext: OÖUB 9 (Wien 1906), S. 893-894