Wir Albrecht von Gotis gnaden herczog zu Österreich zu Steyr zu Kernden vnd zu Krain graf zu Tyrol etc. embieten vnserm getrewn dem pfleger zu Steyr, wer der yetzunt ist oder ye furbaz in chunftigen zeiten wirt, vnser gnad vnd alles gut. Vmb die recht, die vnser stat vnd purger daselbs zu Steyr herpracht habent vnd haben sullent nach irer hantuest vnd prief sag von des verpieten vnd aufhabens wegen in der stat vmb geltschulde, haben wir mit in geschaffet vnd maynen auch gar ernstlich, daz si dieselben recht vesticlich halten nach irr prief sag. Dauon gepieten wir dir ernstlich vnd wellen, were, daz in yeman, ez sei herr ritter oder knecht oder wer er sey, dieselben vnser purger ze Steyr oder einen richter daselbs, wer der ye ist, darumbe veynden oder besweren wolt in dehain weis, daz du in des von vnsern wegen vor seist vnd si vesticlich dauor beschirmest vnd si auch pei den egenanten rechten haltest, wan wir das gar ernstlich also maynen. Geben ze Steyr an sand Thomas tag des zwelfpoten anno domini M° CCC° octuagesimo primo.

Source Fulltext: OÖUB 10 (Wien 1933), S. 74