Wir Wilhelm Mathes Andre Kristan vnd Alber geprüder die Rorer fur vns vnd all vnser erben gegenwürtig vnd kunfftig bekennen vnd tun chunt offenleich mit dem briffe, das wir nach redleichen taydingen, die zwischen dem durichlewchtigen fursten vnserm genedigen herren herczog Albrechten herczogen zu Österreich ains tails vnd vns des andern tails sind geschehen, vns gen demselben vnserm herren herczog Albrechten vnd allen seinen erben verczigen haben vnd verczeihen auch mit gueter vorbetrachtung wissentleich mit dem briffe der vest vnd des purgstals ze Leonstain vnd aller der rechten manschefft eren gueter, gult vnd nucze, die wir damite haben gehabt, wa die gelegen oder wie si genant sein nichts auzgenomen, sunder alles inbeslozzen, also das wir noch vnser erben oder nachkomen noch yeman ander von vnsern wegen darczu dhain vordrung oder ansprach nymmermer haben noch gewinnen sullen noch wellen weder mit recht noch an recht, vil noch wenig in ghain weise, wann vns vnser obgenanter herre herczog Albrecht darumbe mit weraitem gelt genug getan hat in der mazze, daz vns vnd vnser erben des wol vnd billeich genugen sol. Vnd des ze vrchunde vnd ewiger zeugnusse vnd sicherhait geben wir den gegenwurtigen briffe versigelten mit vnsern anhangenden jnsigeln; vnd durich merer sicherhait vnd gezewgnusse haben wir auch gebeten vnser lieben sweger Albern von Zelkingen von Weynperg vnd Wolffharten den Schenken von Dobra, das si auch irew insigel zusampt den vnsern gehengt habent an den gegenwurtigen briffe, der geben ist nach Christes gepurde drewczehen hundert jare darnach in dem zwai vnd newnczikistem iare an sand Thomans abent des heyligen zweliffpoten.

Source Fulltext: OÖUB 11 (Wien 1983), S. 137-138