Mein dinst vor. Hanns Tewffel zw Ottenshaim. Ich beschaid euch gen Ebelsperch zw chomen dez Montags vor sand Egiditag, daz ir euch verantwurtt gen Hannsen dem Schiffer vnd Andre dem Herleinsperiger von der zehentt wegen, di von meinem herrn dem hofmaister zu lehen sind, dew da ligent in Ewerdinger pharr, alz si hernach geschriben stentt; da will ich yeden tail wideruaren lassen, als lehens recht ist. Von erst der zehent aus aim gut, darauf der Gölss gesessen ist, in der Lengaw; item auf einem gutt dapey, daz haist dacz Hoffer; item daselbs auf czwain höffen, ainer haist der Prunhof der ander dacz dem Wagner; item daselbs auf einer hub, di Herwartz chinder habentt; item daselbs auf der Chotherren hoff von Pazzaw; item daselbs auf dez Schiffer hoff; item daselbs auf drein huben grossen und chlain zehent, den man furtt in dez Schiffer hoff ze Lengaw; item den zehent auf zwain hoffen zw Enczleinsdorff. Geben zw Ebelsperch dez Montags vor sand Stephannstag anno etc. Christi LXXXX secundo.

Source Fulltext: OÖUB 11 (Wien 1983), S. 140