Wir Wenczlaw von Gotes gnaden Romischer kunig zu allen czeiten merer des Reichs vnd kunig zu Beheim embieten dem hochgebornen Albrechten herczogen zu Osterich zu Steyern vnd zu Kerrenden etc. vnserm liben swager vnd fürsten vnser gnade vnd alles gut. Liber swager vnd fürste, wir begeren von deiner libe vnd bitten dich mit fleisse vmb die behaltnus, so die edlen Caspar vnd Gundachker gebrüder von Starchenberg den edlen Heinrichen von Rosemberg mit vns getan haben in irer vesten Wiltperg, das du in das durch vnsern willen vorgebest vnd in mit wortten vnd mit werken nich dester veynter seist noch nymand von iren wegen vnd gib in des ouch deinen brief für dich vnd deine erben vnd für die deinen in vnd iren erben, wann wir yns vnd iren erben für vns vnd vnsre erben vorgeben haben, das sie hart dorumb besorgent. Douon getrawen wir deiner libe wol, das du vns sein nicht versagest, doran tust du vns sunderliche libe vnd fruntschaft. Geben zu Piesk vnder vnserm vngedrucktem Insigel noch Crists geburt dreytzehenhundert jar, dornach in dem virvndnewnczigisten jare des nechsten Dinstags noch sand Bartholomes tag vnsrer reiche des Behmischen in dem XXXII vnd des Romischen in dem XIX. Jaren.||
Ad mandatum domini regis Johannes Gamynensis electus cancellarius.

Source Fulltext: OÖUB 11 (Wien 1983), S. 318