Wir Johanns von Gots gnaden markgraffe zu Brandemburg vnd zu Lusicz vnd herczogh zu Görlicz embieten allen hern rittern vnd knechten, dy do siczent zu Osterich oder we sy siczent in des hochgeboren fursten herren Albrechten herczogen zu Osterich zu Steyr zu Kernten vnd czu Krayn etc. vnsers lieben swagers landen, vnsern grus vnd sunderlich fruntschaft. Wir begern von euch vmb die behaltnüsse, so die edeln Caspar vnd Gundachker geprüder von Starkenbergh den allirdurchleuchtigsten fürsten vnd herren hern Wenczlawn Romschen vnd Behemschen kunig vnsern gnedigen hern vnd lieben bruder mit dem edeln Hainrichen von Rosenberg in ir veste Wiltperg getan habent, das ir jn das durch vnsern willen vergebt vnd jn mit worten vnd mit werken in chainerley weise dester veinter dorvmb seit noch nymand von iren wegen vnd besarget sie des mit ewerm prife für ewch vnd ewrr erben sie vnd irre erben, wan der vurgenant vnser herre vnd bruder der konig vnd wir ins mit vnsern prifen vnd worten vergeben haben; douon getrewen wir uch wol, ir versagt vns sein nicht vnd gewert vns in den sachen. Versigilt mit vnserme aufgedrugten insigel gegeben zu Pysk des nehsten Dinstages noch sent Bartholomeus tage des heiligen czwelfpoten nach Crist geburt dreiczehenhundert vnd in dem vier vnd newnczigsten jaren.||
Per dominum ducem etc. Symon etc.||

Source Fulltext: OÖUB 11 (Wien 1983), S. 321