Dem hochgebornen fursten hern Albrechten herczogen zu Ostereich zu Steyr zu Kernden vnd zu Chrayn etc. vnsrem lieben swager embieten wir Johannes von Gots gnaden markgraue zu Brandemburg vnd zu Lusicz vnd herczog zu Gorlicz vnsre fruntschaft grus vnd willige beheglichkeyt zu allen czeiten. Hochgeborner fürste, lieber swager, wir begern von ewer liebe vnd bitten euch mit fleizze vmb dy behaltnusse, so die edlen Caspar vnd Gundacker gebrüder von Starkenberg den allerdurluchtigsten fürsten vnd hern hern Wenczlawen Romischen kunige zu allen czeiten merer des Reichs vnd kunige zu Behem vnsern gnedigen hern vnd lieben bruder mit dem edlen Heinreich von Rosenberg in irr vesten Wiltperg getan haben, das ir yn das durch vnsern willen vergebet vnd in mit worten vnd mit werken nicht dester feinter seyt noch nyemant von iren wegen vnd gebt in ouch des ewern brieff für euch vnd ewer erben vnd für die ewern in vnd yren erben, wan wir ins vnd yren erben für vns vnd vnser erben vergeben haben mit vnsern briuen vnd worten, wann wir wol vernomen haben, das sy euch harte dorvmb besorgen. Do van getrawen wir ewr liebe wol, das ir vns des nicht versaget, doran tut ir vns besunderlich fruntschaft vnd liebe. Mit vrkund diez briues versigelt mit vnserm vfdrukten insigel, geben zum Pyesk des nehsten Dinstages noch send Bartholomens tage des heiligen czwelfboten noch Christi geburt dreyczehenhundert dornoch in dem virvndnewczigsten iaren.||
Ad mandatum domini ducis Conradus etc.||

Source Fulltext: OÖUB 11 (Wien 1983), S. 320