Wir Wenzlaw von Gottes genadten Römischer khunig zu allenn zeitten merer des Reichs vnd khunig ze Behaim bekhennen vnnd thuen khundt offenndtlichen mit disem briefe allenn denn, die inn sehen oder hören lösen, für vnns vnnd all vnnser erbenn vnnd nachkhumben vmb die behaltnusse, so die erbern Caspar vnnd Gundagkher gebrüeder von Starhemberg dem edlen Hainrichen von Rosennberg mit vnns obgenanndten khünig Wennczlaw in irr vesst zu Wildperg gethan haben, das wier vnnd vnnser erben vnnd nachkhumben vnnd alle die vnnsern noch niemanndt von vnnsern wegen gegen in vnnd iren erben vnnd gegen denn iren noch gegen niemandt von irentwegen von der sachen vnnd behaltnusse wegen nicht desster feindter wollenn sein vnnd sollen inn darumbe chainerlav schadten zuziehenn noch thain in khainerlay weiß weder in noch iren erbenn noch denn iren noch niemanndt von irrentwegen von der sach wegenn, alls oben geschriben steedt. Mit vrkhundt diz brieffes versiglt mit vnnser khüniglichenn Maiestadt innsigl geben zum Pyeske nach Cristi geburd dreizehennhundert jare vnnd darnach in dem vierundtneunziggisten jare des negsten Dienstags nach sanndt Bartholomestag des heilligen zwelffpotten vnnser reich des Böhaimbischen in dem zwaiundtreissiggisten vnd des Römischen in dem neunzehendten jar.

Source Fulltext: OÖUB 11 (Wien 1983), S. 317