Wir Albrecht von Gotes genaden herczog ze Österreich ze Steyr ze Kernden vnd ze Krain graue ze Tyrol etc. vnd wir Fridereich von denselben gnaden burggraf zu Nüremberg vnd wir graf Herman von Cili bechennen vnd tun kunt offenlich mit dem brief, als die edeln Hans von Liechtenstain von Nicolspurg vnd Hertneyd von Liechtenstain sein bruder vnd Mathes von Liechtenstain ir vetter für sich selber, für Öfferlein Hansen vnd Hainreichen von Liechtenstain auch ir vettern vnd für Henslein vnd Hertlein gebrüder vnd junkfrawen Kathrein geswistreyde, des obgenanten Hertneyds von Liechtenstain kinder, vnd auch für die erbern Kathrein Reinprechts von Walsee hausfrawn vmb die vngnad, daryn si gen vns obgenanten herczog Albrechten komen sind vnd auch vmb alle herrschefft vesten geslozz merkt dörffer leut vnd guter vnd varund hab in vnsern landen gelegen, die wir darumb zu vnsern handen genomen haben vnd auch vmb alle ander sachen, die sich vncz auf disen heutigen Tag zwischen vns haben verloffen, wie die genant sind, nichts auzgenomen sunder alle inbeslozzen williclich genczlich vnd vnbetwungenlich hinder vns obgenanten drey sind gegangen genczlich stet zu halten zu volfüren vnd an alle widerred dabey ze beleibend, was wir darumb sprechent, als si sich des mit irem hindergangbrief gegen vns verbunden habent, allso sein wir wolbedechtlich darüber gesezzen vnd haben also vmb solche sachen, als vorbegriffen ist, auzgesprochen vnd sprechen auch wissentlich mit dem brief: Des ersten, daz vns vorgenanten herczog Albrechten vnd seinen erben vorauz sullen genczlich ledig vnd los sein vnd auch für sich ingeantwortet werden vnser vier geslos Haymburg Weittenegg mitsampt Persempeug vnd Rechperg mit iren zugehorungen, Valkenstain mit seiner zugehörung vnd Stuchsenstain mit seiner zugehorunge, die vest zum Hof vnd Puchperg mit allen iren zugehörungen, als die egenanten vesten alle Hanns von Liechtenstain hat innegehabt. Darnach sprechen wir aber, daz vns demselben herczog Albrechten vnd vnsern erben auch beleiben sullent die nachgeschribenn vesten vnd herrschefft des ersten Taufers vnd der Stayn bei Meran an der Etsch, item die vest Pernstain item Spilberg item Werfenstain item Tulbingen item Hintperg item Swabdorf item Enczestorff item sand Margarethen item Miterndorf item die vest Weissenberg vnd die vest Schönaw mit allen iren zugehörungen, als die Hanns von Liechtenstain hat innegehabt. Wir sprechen auch, daz vns egenanten herczog Albrechten vnd vnsern erben beleiben sollen alle andere güter, es sein merkt dörfer heuser in der stat oder vor der stat zu Wienn vnd der werd bei Wienn vnd alle weingerten perkrecht purkrecht zehendt nucz vnd gülten vnd alle ander vesten vnd güter, wie die genant sind hiedishalb der Tunaw gelegen oberhalb vnd nyderhalb der Ens gar nichts auzgenomen. Auch sprechen wir, daz vns egenanten herzog Albrecht vnd vnsern erben sol beleiben alle varend hab, wie die genant ist nichts auzgenomen, der wir vns vnderwinden vnd auch zu vnsern handen genomen haben. Wir sprechen auch, daz vns demselben herczog Albrecht vnd vnsern erben sullent beleiben alle hantueste briefe vnd vrbarbücher, die vber die egenanten herrscheften vest leut vnd guter, als oben geschriben stet, lautend vnd sagent. Wir sprechen auch, daz wir obgenanter herczog Albrecht noch vnser erben nichts zu schaffen haben sullen mit dhainerlay geldschuld verzichtnuss heyratgut oder leibding, die die egenanten Liechtenstainer iren weiben oder andern leuten getan oder gemacht habent, sunder si sullent das alles selber vnd allain ausrichten an vnsern vnd vnserr erben schaden. Auch sprechen wir, daz sich die egenanten Liechtenstainer sullen der obgenanten stuk verczeihen, als vormals ist beredt worden, vnd dieselben Liechtenstainer sullen auch die versorgbrief vnd die verczeichbrief vnd auch ander brief geben, vnd die sullen auch auzgerichtet vnd vorhin vergütet werden, als auch emaln ist beredt worden. Darnach sprechen wir, daz dise nachgeschribene stuk, die in vnserm herczog Albrechts land zu Österreich sind gelegen, den egenanten Liechtenstainern vnd iren erben sullent beleiben: des ersten die herschafft Statz vnd die veste zu Velsperg mit irer zugehörung, item die vest Rabenspurg, item Ringleinstorff die vest, item die vest Mistelbach, item Vlreichskirchen die veste mit allen zugehörungen, als die der egenant Hans von Liechtenstain hat inngehabt, item die vest Ebelsperg vnd Ryedegg mit iren zugehörungen vnd auch in dem rechten, als die an den egenanten Hannsen von Liechtenstain von dem goczhaus zu Pazzaw kömen sind. Wir sprechen auch, daz in vngeuerlich wider werden sullent alle die brief vnd vrbarbücher, die vber die die egenanten güter, die in beleibent, gehörent, vnd auch alle die brief, die vber ir veterlich erb sagent. Auch sprechen wir, daz die egenanten Liechtenstainer vnd ir erben selber sullent auzrichten alle ir geltschuld, die sie sullent gelten, an vnser obgenanten herczog Albrechts vnd vnserr erben schaden. So sprechen wir auch, ob die obgenanten Liechtenstainer iren weiben oder andern leuten nach irer notdurfft an geuerd auf den vorgenanten herrscheften vesten geslossen vnd gütern, die in beleibent vnd die von vns herczog Albrechten zu lehen sind, icht machen wolten, daz wir derselb herczog Albrecht in des stat tun vnd gonnen sullen, doch vnserr lehenschafft vnschedlich. Wir sprechen auch vmb Aychach an der Etsch, daz der von Brichsen Hainreichen von Rotemburg hauptmann an der Etsch von dem egenanten Hansen von Liechtenstain hat verlihen, daz demselben Hansen von Liechtenstain sein tayl daran sol beleiben, doch also, daz der egenant von Brichsen in vnd iren widertailn den Sebnern vnd iren mittailen darumb ainen tag für sich sol geben, vnd was sich da vor im darumb mit dem rechten eruindet, dabey sol es denn beleiben. Mit vrkund dicz briefs geben zu Wienn an sand Dorothentag nach Kristes gepurd drewczehenhundert jar darnach in dem fünfvndnewnczgisten jaren.

Source Fulltext: OÖUB 11 (Wien 1983), S. 363-366