Ich Hanns von Liechtenstain von Nicolspurg ich Hertneid von Liechtenstain sein bruder ich Kristoff von Liechtenstain ich Mathes vnd ich Hainreich von Liechtenstain gebrüder, der vorgenanten von Liechtenstain vettern, bechennen vnd tun kunt offenleich mit dem brief allermenikleichen gegenwürtigen vnd künftigen, die in ansehent oder hörent lesen, für vns vnd all vnser erben vnd nachkomen vnd sunderleich für Henslein vnd Hertlein von Liechtenstain, meins egenanten Hertneids sün, die noch nicht zu iren jaren komen sind, vnd für die wir vns wissentleich annemen, von der vngnad wegen, so die hochgebornen fürsten vnser gnedig herren herczog Albrecht der elter herczog Wilhalm vnd herczog Leupolt gebrüder sein vettern vnd herczog Albrecht der jünger, des egenanten herczog Albrechts sun, herczogen ze Österreich ze Steyr ze Kernden vnd ze Krain grauen ze Tyrol etc. von irselbs irr vettern vnd brüder vnd auch ier land vnd leutt wegen hincz vns vncz her habent gehabt vnd darumb sy vns auch mit vnsern leiben zu iren handen geuangen vnd genomen habent vnd darumb auch ich obgenanter Mathes von Liechtenstain in derselben meiner herren von Österreich vngnad komen vnd gewesen bin, daz wir nach fleizziger pet, die die hochgeboren burggarf Fridreich von Nüremberg vnd der edel graf Herman von Cili vnser lieb herren vnd auch ander vnser nach geschriben freunde für vns habent getan, willikleich vnd vnbetwungenleich an all nottung vnd zu der zeit vnd statt, da wir das mit freyem willen wol getun mochten, darumb mit den egenanten vnsern gnedigen herren von Österreich genczleich vnd freuntleich sein verricht vnd vberain kömen, als hernach geschriben steet; Des ersten haben wir gelobt vnd verhaissen verhaissen vnd geloben auch wissentleich mit kraft dicz briefs, daz wir all vnd vnser yegleicher besunder gegen vnserm egenanten herren von Österreich und den erwirdigen vnsern herren hern Pilgreim erczbischofen ze Salczburg hern Perchtolden bischofen von Freising vnserr egenante herren von Österreich kanczler vnd auch allen andern herren pfaffen layn ritter vnd knechten, wie die genant sind, vnd allen iren helffern vnd dienern vnd sunderleich gegen den, die vns in derselben vanknuss behalten gehüttet oder gefürt habent, vnd auch gen allen den, die mit worten oder mit werchen dazczu hilfleich oder fürderleich sind gewesen oder die in dhain weis darynn verdacht sind vmb alle sach, wie sich die vncz auf disen heutigen tag habent verlauffen, alle feyntschaft vnwillen vnd vngunst gar vnd genczleich haben abgelassen vnd lazzen auch wissentleich für vnsselb vnser erben vnd nachkomen all vnser freund helffer günner vnd diener, sunder daz wir nu fürbazzer den egenanten vnsern herren von Österreich dienstleich sein sullen vnd wellen vnd auch gegen den egenanten vnsern herren von Salczburg vnd den von Freysing vnd auch gen allen andern, als vorgeschriben steet, gemainleich vnd ir yegleichem in sunder hinfür lauttere vnd gancze trew vnd freuntschaft tun vnd halten sullen vnd wellen genczleich vnd vngeuerleich. Vnd daz alle obgeschriben sachen vnd artikel stet gancz vnd vnczerbrochen beleiben vnd von vns allen vnd vnser yegleichem vnwiderruffleich nu fürbazzer allezeit werden gehalten, haben wir den obgenanten vnsern herrn von Osterreich vnd allen iren erben vnd nachkommen die nachgeschrieben vnser herschefft gesloss vessten merkt dörffer leutt vnd guter zu rechtem fürphand versaczt vnd verschriben verseczen vnd verschreiben in auch die wissentlich mit dem brief: des ersten die herschaft vesst vnd statt zu Velsperg mit ier zugehörung, die vest Rabenspurg die vest Mistelbach, die vesst Ringleinstorff, die vesst Vlreichskirchen mit allen iren zugehörungen, item auch die zwo vesten Ebelsperg vnd Riedegg mit iren zugehörungen vnd auch alle andere güter, wie die genant sind nichts auczgenomen, die wir enhalb der Tunaw haben vnd als ich egenanter Hanns von Liechtenstein die alle ynnegehabt vnd herbracht hab mit allen würden eren nuezen gülten gerichten vnd allen andern zugehörungen, in solher mass, ob wir oder yemand anderr von vnsern wegen von der obgenanten sach wegen hinfür wider die egenanten vnser herren von Österreich oder ir erben oder wider den von Salczburg den von Freysing vnd ir nachkomen vnd goczhewser leutt oder güter oder all ander vnd yegleich, so uor genant sind, oder ir erben icht tetten, da Got uor sey, mit worten oder werchen, das wissentleich merkleich oder offenwar ward an geuer, daz denne die vorgenante vnser herschefft vnd gesloss alle vnd ir yegleichs denselben vnsern herren von Österreich vnd iren erben ledikleich vnd genzleich sullen veruallen sein vnd mugen sich der denn vnderwinden vnd die in ir gwer nemen an klag vnd an alle suchung des rechtens vnd auch damit vollikleich handeln vnd tun, wie in das allerpest wol kumpt vnd fügleich ist, als mit anderm iren aygen gut vnd dawider sullen wir nicht sein noch tun noch dawider nymer gestatten ze tun weder mit gericht noch an gericht gaistleichem noch weltleichem in dhain weg. Vnd ob wir die sach yndert überfüren vnd daz sich der val also vergieng vnd dacz vnser herren von Österreich die gesloss in ir gwalt also nemen, dennoch sullen wir vnd all vnser erben vnd nachkomen alle die stuk vnd artikel, die uor sind begriffen, genczlich stet halten vnd volfüren vnd dawider nymer getun. Vnd daz dicz vorgeschriben sachen vnd tayding vnd all vnd yegleich pünd vnd artikel, die hieuor sind geschrieben, von vns war stät vnd vnczerbrochen werden genczleich gehalten vnd volfürt, das geloben wir bey vnsern eren vnd trewen vngeuerleich vnd bey den ayden, die wir darumb leibleich zu den hailigen gesworn haben auf dem heiligen Ewangeli mit aufgelegten vingern vnd gelerten worten dawider nymer ze tun schaffen gestatten noch geholen ze tun in dhain weis von vns noch yemand der vnsern vn vnsern wegen vngeuerleich. Vnd daz dis alles war vnd stet beleib vnd von vns vnczweiueleich werd gehalten vnd volfürt, so geben wir den egenanten vnsern herren von Österreich den brief versigelten mit vnser aller obgenanten von Liechtenstain anhangenden insigeln vnd haben gebeten die edeln vnser lieb herren vnd freunde graf Hermann von Cili, Hainreichen von Walsse, Reinprechten vnd Fridreichen gebrüder von Walsse, Vlreichen von Walsse iren vetter, Albern den Stuchsen von Trawtmanstorff, Hainreichen von- Celking, Ludweigen von Ekharczaw vnd Hannsen von Eberstorff vnd die edeln vnser lieben freundt Erharten von der Kunstat, Benischen von Grawarn vnd Janen von Sternberg genant von Lukaw, daz sy ire insigel zu ainen geczeugnuss der sach zu den vnsern an disen brief habent gehenkt. Vnd wir die yecz genanten all von Österreich vnd von Merchern bechennen, dacz wir durich fleizzige pet willen der vorgenanten von Liechtenstain der sach geczeugen worden sein vnd vnsere insigel daran gehenkt haben, also, ob die egenanten von Liechtenstain oder ainer vnder in oder yemand von iren wegen die vorgeschriben stuk vnd artikel dhainen yndert vberfüren, das wissentleich vnd offenbar wurd vnd daz darumb vnser egenante herren von Österreich mit in wurden ze handeln gewinnen mit krieg oder sust, wie sich das fügte, so sullen vnd wellen wir bei vnserm trewn denselben von Liechtenstain darynn weder helffen raten noch bey gestendig sein in dhain weis an alle geuerde. Der brief ist geben ze Wienn an Suntag nach sand Dorotheentag der heiligen junkfrawn nach Christi gepurd drewzehenhundert jar darnach in dem fünfvndnewnczigisten jare.

Source Fulltext: OÖUB 11 (Wien 1983), S. 373-376