Ich Hanns von Liechtenstain vnd Nicolspurg ich Hertneid von Liechtenstain sein bruder ich Kristoff von Liechtenstain ich Mathes ich Hanns ich Hainreich gebrüder von Liechtenstain, der vorgenanten von Liechtenstain vettern, bekennen vnd tun kunt offenleich mit dem brief allermenikleichem gegenwürtigen vnd künftigen, die in ansehent oder hörend lesen, für vns vnd all vnser erben vnd nachkomen vnd sunderleich für Hennslein vnd Herttlein gebrüder von Liechtenstain, mein egenanten Hertneids sün, die noch nicht zu iren vollen jaren komen sind, für die wir vns wissentleich annemen, von der vngnad wegen, so die hochgeporen fürsten vnser genedig herren herczog Albrecht der elter herczog Wilhalm vnd herczog Leupolt sein vettern vnd herczog Albrecht der jung, des egenanten herczog Albxechts sun, herczogen ze Österreich ze Steyr ze Kernden vnd ze Krain grafen ze Tirol etc. von irselbs irer vettern vnd brüder vnd irer land vnd leut wegen vncz her zu vns habent gehabt vnd darumb si vns auch mit vnsern leiben zu iren hannden geuangen vnd genomen habend vnd darumb auch ich obgenanter Mathes von Liechtenstain in derselben meiner herren von Österreich vngnaden komen vnd gewesen bin, daz wir nach fleizziger pet, die der hochgeporn purggraf Fridreich von Nüremberg vnd der edel graf Herman von Cili vnser lieb herren vnd auch ander meniger herren vnd freunt für vns getan habent, willikleich vnd vnbetwungeleich an alle notung zu der zeit vnd stat, da wir das mit freyem willen wol getun mochten, darumb mit vnsern egenanten genedigen herren von, Österreich gentzleich vnd frewntleich sein verricht vnd vberain komen. Also haben wir auch gelobt vnd verhaissen geloben vnd verhaissen auch wissentleich mit kraft ditz gegenwürtigen briefs, daz wir all vnd vnser yegleicher besunder gegen dem hochwirdigen fürsten vnd herren hern Pilgreimen ertzbischofen ze Salczpurg legaten des Stuls ze Rom seinem gotzhaus seinen nachkomen allen seinen frewnden vnd iren erben helffern vnd dyenern gunnern leuten vnd gütern vnd auch gen den, die vns in derselben vankhnuzz behalten gehütt oder gefürt habent, vnd auch mit allen den, die mit worten oder mit werchen darczu hilfleich vnd fürderleich sind gewesen oder die in dhain weis darin verdacht sind, vmb all sach, wie sich die vncz auf disen heutigen tag habent verlauffen, all veintschafft vnwillen vnd vngunst gar vnd genczlech haben abgelassen vnd lassen auch wissentleich für vns selb vnser erben vnd nachkomen all vnser frewnt helffer gunner vnd dyener. sunder daz wir fürbasser gegen den egenanten vnsern herren von Salczpurg seinem gotzhaus seinen frewnden iren erben helffern vnd allen andern gemainkleich vnd ir yegleichem besunderlich von der sach wegen hinfür lautter vnd gantz frewntschafft tun vnd halten sullen vnd wellen getrewleich gentzleich vnd vngeuerleich. Vnd das dis vorgeschriben sach vnd tayding all vnd yegleich, so vorgeschriben sind, von vns wär stet vnd vnezebrochen werden genczleich gehalten vnd volfurt, das geloben wir bey vnsern eren vnd trewn vngeuerleich vnd bey den aiden, die wir darumb leipleich zu den hailigen gesworen haben auf dem hailigen Ewangeli mit aufgelegten vingern vnd gelerten worten dawider nymmermer ze tun schaffen gestatten noch gehelen dawider ze tun in dhain ||
weis von vns noch yemand der vnsern von vnsern wegen vngeuerleich. Vnd darüber zu ainer merern sicherhait vnd bestetigung aller obgeschriben sach vnd taiding so verpinden wir vns bey den aiden vnd gelübden, als vorgeschriben steet, vnd auch bey allen den punten vnd artikeln, die in den briefen steend, die wir vnsern herren von Österreich sunderleich darumb geben haben, alles das gentzleich stet zu halten vnd ze volfüren, das wir an dem brief geschriben steet an alles geuerd. Vnd des ze vrkund haben wir obgenante von Liechtenstain all sechs vnsre insigel gehenkhet an disen brief, der geben ist ze Wienn an Suntag nach sand Dorotheentag nach Kristes gepurd drewtzehenhundert jar darnach in dem fünfvndnewnczigisten jare.

Source Fulltext: OÖUB 11 (Wien 1983), S. 376-378