Wir Albrecht von Gots gnaden herczog ze Österreich ze Steyr ze Kerenden vnd ze Krain graue ze Tyrol etc. bechennen, daz wir vnsern getrewn lieben den burgern vnd statt ze Ens die gnad getan haben vnd tun auch wissentleich mit dem brief, daz si ir salcz mugen in das Machland füren vnd da verchauffen vnd vertreiben, als das von alter herkomen ist, vnd sust niemand ander. Darumb gebietten wir vestikchleich allen vnsern hauptleuten herren rittern vnd knechten phlegern purggrafen richtern vnd allen andern vnsern amptleuten vnd vndertanen, den der brief geczaigt wirdt, daz sy die egenanten vnser burger vnd statt dabey lassen beleiben an all irrung vnd hindernusse vnd dawider nicht tun noch gestatten ze tun in dhainer weis. Daz ist genczleich vnser mainung. Geben ze Lincz an Suntag vor sand Pangreczentag nach Kristi gepurd driuczehen hundert jar darnach in dem funfvndneunczigistem jare.||
Dominus dux per se.

Source Fulltext: OÖUB 11 (Wien 1983), S. 406