Wir Albrecht von gotes gnaden herzog ze Österreich ze Steyr ze Kernden vnd ze Krain, Graf ze Tyrol etc. bechennen, daz vnser getrewer Niclas der Enstaler vnd Elspeth sein hausfraw mit vnser hand gunst vnd gutem willen vnserm getrewen Hansen dem Seybranten, vnserm pürger ze Wels, versazt habend vierdhalb zehent hawser gelegen ze Pendenstorff in Swannser pharr, die von vns ze lehen sind, also daz der egenant Hans Seybrant vnd sein hausfraw vnd ir paider erben den vorgenanten zehent mit aller seiner zugehorung nu furbasser von vns vnd vnsern erben in sazes weis ynnehaben vnd niessen sullen als sazes lehens vnd landes recht ist doch vns vnd denselben vnsern erben vnschedleich an der lehenschafft. Mit vrchund diz briefs geben ze Wienn am samztag nach sand Peters vnd sand Paulstag der heiligen zwelffpotten nach Kristes gepurdt drewzehenhundert iar vnd darnach in dem siben vnd neunzigisten iare.

Source Fulltext: OÖUB 11 (Wien 1983), S. 622